E berdad tras di maneho di Utilities Aruba
Mi a tuma nota di Utilities su comunicado tocante e peticion cu VWI a entrega pa haci un investigacion na Utilities na Ministerio Publico.
Mescos tur su otro reaccionnan riba e ponencia di VWI, atrobe Utilities su respuesta ta carece di onderbouwing solido y ta mas basa riba autoridad. E unico nancu ta kere e justificacion di Utilities pa su accionnan ta gobierno cu ta instruinan y nan simpatisantenan.
Ban analisa un rato:
Utilities ta bisa cu no a viola regla di e Corporate Governance Code (CGC). Ban ta serio. Si bo ta operando pafor di loke bo statuten ta stipula y bo maneho ta uno encontra di e pricipio di GCG (roles and responsabilities). E directornan di WEB y Elmar ta statutariamente repsonsabel pa e maneho di e empresanan. Utilities como representante di e doño , esta Gobierno di Aruba (bou mandato di Pueblo)ta stipula e maneho energetico nacional y e companianan WEB y ELMAR ta ehecuta esaki na e manera mas practico y comercialmento factibel. E relidad ta cu desde cu MEP ta den gobierno cos a para bira cu ta Utilities ta sinta den stoel di e directeurnan di WEB y ELMAR y asina ta manehando e companianan pa medio di “remote control”. E directeurnan di WEB y ELMAR mester bai di acuerdo cu loke Utilities su kier si no nan ta perde nan trabou.
Pueblo, kende ta e berdadero doño di WEB y Elmar, boso a puntra bo mes dicon diripiente Utilities mester lidera y ta lidera un destaho publico cu ta responsabilidad di WEB? E maneho di Utilities ta uno puramento politico cu intension di priviligia Friends and Family. Scriptura ta bisa cu bo no por sirbi dos dios pasobra bo ta caba ta stima un y odia e otro. Na mi parecer Utilities nunca lo por sirbi interes di e compania nan WEB y Elmar. Dicon? Pasobra sirbiendo e interes di WEB y Elmar lo stroba nan di sirbi e interes di friends and family.
Addicionalmente mi kier corda pueblo cu WEB ta NV pa un motibo.
Ora WEB tabata un dienst di gobierno y tabata wordo maneha directamente for di bestuurskantoor, WEB tabata tin problema continuo den operacion y problema den red di distribution di awa. Splittubes di boilers, blackout y brownout, y awa bruin tabata na ordo di dia. Bou di maneho di politiconan WEB tabata na werki y mester a converti WEB den un NV pa asina por haya financiamento pa inverti den un infrastructura cual tabata den mal condicion y tambe pa atrae profecionalnan pa maneha e compania na un manera profecional y comercial.
Mi ta cita e remetido di Utilities: “Utilities no tin culpa cu durante e periodo prome cu e director actual, nada a wordo haci pa cu un Plan di Energia. Mas bien tabata tin varios aña di stagnacion y proyectonan cu no a resulta.” No tin nada mas leu di e berdad cu ta e mentira bergonsoso aki.
E statement aki di Utilities ta un hilaridad (eigenlijk e ta hopi tristo). Tur stagnacion cu tin ta causa door di Utilities su metemento politico directo den WEB. No a permiti WEB di hedge ora tabata oportuno, y awe pueblo ta sintie profundamente den su cartera. Utilities a stop of stroba tur projectonan cu awe lo por a mengua e presion cu tin riba pueblo.
Cada biaha e partido MEP ta na mando nan ta bagatalisa tur hende cu ta tribi di cuestiona loke nan ta haci. Un par di aña atras a saca salario nan di trahado nan di WEB y Elmar den publicidad y awo ta purba atrobe di pinta e trahado nan di WEB malo pa sina nan por sigui haci y deshaci y asina keda favorece nan amigo y famianan manera semper MEP a bin haci ora nan ta den gobierno.