Minister Maduro ta informa riba trabounan na Hulanda:

ARUBA TA ACERCA VERENIGING VAN NEDERLANDSE GEMEENTEN PA YUDA DEN IMPLEMENTACION DI E LANDSPAKKET.

E siman tras di lomba Minister President y Minister di Finansa tabata na Hulanda pa reuni cu varios persona y instancia riba e situacion financiero di Aruba. E delegacion di Aruba tabata di bishita tambe cerca Burgermeester di Den Haag y alabes Presidente di Vereniging van Nederlandse Gemeenten (VNG) sr. Jan van Zanen. Pa Minister Maduro e tabata un placer pa bolbe topa cu sr. Van Zanen cu semper tin un ‘warm hart’ pa nos Pais. Aruba ta afilia na VNG y den cuadro di esaki ta busca cooperacion y yudansa pa asina nos por ehecuta algun trabou necesario pa por cumpli cu e Landspakket. Ta trata aki di tema A cual ta encera e maneho financiero pa cual ya caba Aruba tin un ‘roadmap’ traha cu awor mester cuminsa wordo implementa. Hunto cu VNG lo explora con por yuda cu capacidad humano pa asina por ehecuta e plannan pa mehoracion di Gobierno su procesonan financiero.