A bolbe nombra Richard Dijkhoff den comision financiero di CONCACAF

ORANJESTAD, Aruba – 27 di januari 2022: Recientemente ing. Richard Dijkhoff, siendo e vice-presidente di Caribbean Football Union (CFU) a ricibi e grato noticia cu CONCACAF a bolbe nombr’e den e comision financiero pa e siguiente cuater añanan. E nombracion aki ta basa riba e confiansa cu nan tin den dje y tambe pa e bon trabou cu el a haci pa futbol en general, pero tambe como miembro di e comision ariba menciona, cual comision ta un di e esunnan di mas importante di CONCACAF.

Tarea di e comision financiero
E comision aki tin cu garantisa e stabilidad financiero di CONCACAF door di entre otro, supervisa e presupuesto y inversionnan, incluso duna recomendacion riba e subsidionan pa desaroyo di e 41 miembronan di CONCACAF y otro gruponan. Tambe e comision aki ta elabora y propone strategianan, supervisa e strategianan aki y tambe ta analisa e apoyo y programanan cu duna e miembronan di CONCACAF.

Promove mas desaroyo den futbol
E comision financiero particularmente ta analisa e desafionan di e desaroyonan den wega, ta conseha y asisti e directiva di CONCACAF riba e miembronan y nan programanan di desaroyo, ta propone actividadnan di desaroyo nobo y ta trata asuntonan di presupuesto. Tambe e comision ta diseña reglamentonan pa programanan di desaroyo pa e miembronan di CONCACAF.

Tocante CONCACAF
A funda Confederation of North, Central American and Caribbean Association Football (CONCACAF) dia 18 di September 1961 na Mexico City unda cu a uni NAFC y CCCF. Esey a bira e di 5 confederacion di continente bou di FIFA, cu entretanto a crece na 6 continente afilia. E miembronan cu a fund’e ta Canada, Costa Rica, Cuba, El Salvador, Guatemala, Haiti, Honduras, Mexico, Antias Hulandes (Corsou), Nicaragua, Panama, Surnam y Merca.

Tocante CFU
Caribbean Football Union (CFU) ta e organisacion representante dje asociacionnan di futbol den Caribe. E ta representa 25 nacion miembro di FIFA, como tambe 6 teritorio no afilia na FIFA. A establece e Union na januari 1978 y su Asociacion Miembro ta competi den region di CONCACAF.
Tambe CFU ta atende cu competencia den desaroyo, inclui ‘Challenge Series’ femenino, mucha homber y mucha muhe.

Exportando experiencia y experticio
Un biaha mas ing. Richard Dijkhoff ta representa nos isla internacionalmente, cu ta haci nos masha orguyoso. El a sirbi pa dos termino sigui den e funcion di presidente di Arubaanse Voetbal Aruba (AVB), a cera un netwerk di contacto grandi y prominente den henter nos region. Separa di esey a logra cambionan drastico den desaroyo y innovacion di futbol, pa cual Caribbean Football Union y CONCACAF ta sigui haci uzo di su experiencia y experticio pa yuda otro islanan den nos region. Na CONCACAF el a cera un amistad estrecho cu e presidente di e federacion, mescos cu e secretario general. Ambos ta kere totalmente den su conocemento y ta haci bon uzo di e “storia di exito di Aruba” pa logra cambio den otro mercadonan tambe.