Parlamentario Shailiny Tromp-Lee (MEP):Parlamento participando na Congreso InterExpo cu tema Igualdad den Reino na Hulanda

Parlamento di Aruba, esta Presidente y lidernan di cada Fraccion, ta participando na e di 32 Congreso cu ta tuma luga dianan 7 y 8 di december 2022 na Nieuwspoort, Den Haag, Hulanda. Tema di e congreso di e aña aki ta: Igualdat den Reino. Pa medio di charlanan lo pone lus y discuti riba un variedad di topico. Prome dia a y lo trata topiconan manera oportunidad igual di enseñansa den Reino, Long life learning y perspectiva di crecemento laboral y tratadonan fiscal. E prome dia lo finalisa cu un debate encuanto e topico: proteccion igual di derechonan humano. Pregunta central lo ta: Derechonan fundamental den Reino: mester mas unidad den proteccion?

Sigur mediante e congreso, oradornan y participantenan lo por aporta na  e discucion y crea ideanan con miho por traha pa realisa igualdad den Reino. E Congreso ta brinda e oportunidad  pa e paisnan den Reino por bin mas hunto  y sostene e proceso con e paisnan lo por yuda otro riba diferente tereno. Esaki lo por yuda nos pa atende miho cu nos retonan y probecha miho di e oportunidatnan cu Reino ta brinda. Manera e organisadornan di e Congreso mes ta indica, pa medio di historia comun y patrimonio cultural comparti tin un base fuerte pa traha riba colaboracion constructivo den Reino. E colaboracion  no ta solamente un asunto politico y di gobernacion.  

Prome dia lo tin 8 orador y di dos dia 9 orador y tur dia lo termina cu un debate entre panelista di Hulanda y e paisnan den Caribe. Como Presidente di dia ta fungi mr. Jeroen Recourt, senador den 1ste Kamer y e debatenan lo ta dirigi e prome dia pa drs. Jacobine Geel cu ta voorzitter di College voor de Rechten van de Mens y di dos dia pa prof. Dr. Ernst Hirsch Ballin. E Congreso a keda habri pa Staatssecretaris voor Koninkrijksrelaties en Digitalisering sra. Alexandra van Huffelen cu den su speech di apertura a indica cu nos mester reenforsa nos relacion y hunto traha na nos retonan. Algo cu ta importante pe y pa e gabinete den su totalidad. Topiconan cu sigur tin mi atencion ta enseñansa, deficit democratico y tur clase di posibel cooperacion pa hunto den Reino nos atende cu nos retonan.