Parlamentario Miguel Mansur: Irregularidadnan tumando lugar entorno Aruba su registro pa aviacion stranhero.
Awe mi a manda preguntanan pa Minister di Transporte, Integridad, Naturalesa y Cuido di Anciano, sr. Ursell Arends tocante irregularidadnan tumando lugar entorno Aruba su registro pa aviacion stranhero. E sucedidonan ta transcuri varios gobernacion y ta envolvi varios Minister, ex-Minister, consehero, ex-consehero, director y ex-directornan. Na 1995 e Minister di Transporte y Telecomunicacion sr. Glenbert Croes a anuncia cu Aruba lo cuminsa un registro pa avionnan stranhero y nan a firma un contract exclusivo cu International Aviation Safety Office (IASO) di un comerciante Hondureño, Jorge Colindres. E contract tabata tin un duracion original di 5 aña y supuestamente 250 avion lo mester a keda registra y cu entradanan di dicho registro lo cubri full e presupuesto di Departamento di Aviacion Civil (DAC). Esaki no a sosode y mi ta buscando claridad si e compania a paga su boet di USD 50.000,00 pa incumplimento.
E beneficio di opera un registro pa aviacion stranhero a resulta un ilusion y peor ainda e compania IASO a wordo denuncia na Landsrecherche pa fraude. Tin por lo menos dos caso caminda companianan a haci pago di USD 30.000,00 y USD 78.000,00 na IASO pa permisonan mientras Aruba no tabata rekeri dicho pagonan. Ariba conseho di Veiligheidsdienst Aruba, ex-minister E. Briesen (MEP) a entama un caso pa kibra e monopolio cu IASO tabata goza di dje. Gobierno a gana su caso pero sorprendentemente a sigui cu e negoshi cu IASO/Colindres. Mi kier tende di Minister pakiko Aruba no a implementa e veredicto di e caso?
Aunke no a termina e negoshi cu IASO, ex-Minister, Minister, Director, ex-Director y inspectornan di Departamento di Aviaicion Civil (DAC) a wordo invita pa atende diferente excibicionnan di aviacion incluyendo na Paris, Ginebra, London, Shanghai, Dubai etc pa promove e registro di Aruba ariba invitacion di IASO y cu e compania cargando tur gasto. Ruman di Minister Glenbert Croes cu a firma e contract na 1995, Junior Croes ta/tabata IASO su representante na Aruba y clarificacion ariba su rol ta un di e preguntanan cu a ser haci na Minister Arends? Recientemente e mesun consehero actual di Minister tabata involucra den e negociacionnan pa cera un contract entre Eagle LNG y WEB den su funcion na RDA.
E tarifanan cu Aruba ta cobra ta abao compara cu otro paisnan manera San Marino caminda IASO tambe ta opera un registro. Recomendacionnan di Director di DAC pa haci tarifa a wordo ignora y actualmente ta haci uso di ‘designated inspectors’ lugar di inspectornan di DAC mes y esey tambe ta algo cu mi kier haya clarificacion ariba ya cu DAC ta cobra pa inspecciona.
Na 2018 a sali den media local cu un delegacion consistiendo di entre otro ex-Minister Chris Romero, Minister Glenbert Croes, Director di DAC Edwin Kelly, coordinador Junior Croes y varios inspector a atende European Business Aviation Convention and Exibition (EBACE) na Ginebra (Bijlage 1). Esaki ta un di hopi biahanan ariba invitacion di IASO/Colindres pa promove ‘The Registry of Aruba.’ Mi a manda pidi clarificacion cuanto biahe asina a wordo haci durante e ultimo añanan y si e Ministernan a declara nan como regalo segun ley. Na mes momento mi a puntra si a yega di investiga e compania aki su donacionnan na politico y partidonan local. Tambe mi kier haya aclaracion si tin un riesgo di siguridad mirando cu a permiti e mesun compania priva instala tur computer den oficina di aviacion civil.