Ministerio Publico a pidi un castigo di 12 aña incondicional pa e periodista Elvis Weert

Tres hoben a haci denuncia contra ex locator Elvis di a comete actonan di inmoralidad of di a viola nan na momento cu nan tabata biba na su cas. Ta trata di yiunan di pareha of ex pareha di e acusado, pa kende Ministerio Publico a pidi un castigo di 12 aña incondicional. Sentencia lo tal dia 11 di februari awo.
Awe Fiscal a agrega dos acusación mas contra Weert, cu ta esun di e victima kende tin 27 aña y tal biba na Hulanda. E acusacionnan contra Weert ta violacion y abuso sexual di un menor di edad den e periodo di 19 di maart 2005 y prome di maart 2009. E ta wordo acusa tambe cu contra boluntad di e persona, a dun’e un tratamento pa termina su embaraso den e periodo di 19 di maart 2006 te 19 di maart 2009 y di a intencionalmente causa e persona lesion grave.
Ta papia aki di tres victima.
E acusado Weert ta admiti solamente e caso di e denunciante MB, kende awendia ta biba na Hulanda. Ta combersacionnan via whattsapp entre e dosnan aki unda B ta reclam’e loke el a haci cu ne tempo e tabata jong, cu a bira e pruebanan principal pa e acusacionnan, entre otro esnan di abortus.
E denuncia di MB ta data di october, 2012, y despues cu e otro casonan nobo a bini dilanti, a cuminsa investiga esey tambe. Asina a keda acumula prueba te ora cu a yega na su detencion.
E acusado ta bisa cu e ta consciente cu e relacion cu MB ta prohibi y den e mensahenan el a bisa e mucha muhe cu e stim’e.
Den e caso di abortusnan, e ta para riba cu e ta algo cu nan a palabra hunto pasobra no tabata e momento adecuado pa e mucha muhe haya yiu. E dama hoben aki den su declaracion tambe a bisa cu el a papia cu Elvis ora di e prome abortus y a bis’e bon cla cu “t’ami curpa tambe” mustrando cu e tabatin su duda pa haci e acto.
E di dos abortus e acusado a sinti su mes asina inteligente cu e mes a dicidi di practica esaki. “Mi a mira con e Ginecologo a haci, y el a splicami e procedura cu el a haci,” tabata su splicacion den Corgte.
MB a conta su maestro / docente loke a pasa cu ne y a bay Voogdijraad. E instancia aki a manda yama e tata y conte kico e yiunan a conta. E tempo ey a dicidi di kita e muchanan for di e mama y nan a bay cerca e tata. Pero nada no a sosode pasobra e mama no kier a entrega keho.
Despues a bini e denuncianan nobo y MB a dicidi cu Weert no por sigui caba cu bida di otro hobennan y a cuminsa busca prueba, for di su mesun boca, y haci e denuncia. Como cu e ta biba na Hulanda, Recherchenan di e pais ey a interogue y a traha rapport manda pa KPA.
Di e casonan nobo, un di e victimanan tabata asina traumatisa cu el a cuminsa corta su mes y asina el a hala atencion di docentenan cu a cuminsa papia cu ne pa mira kico a pasa. El a conta nan y a bisa na mesun momento cu e no ta conta su mama, pasobra e no ta kere. E tambe a haya ayudo di Psycholoog.
Fiscal a bisa cu tur e denuncianan tin mesun patronchi, muchanan hoben, facil pa manipula, yiunan di su parehanan, intimidacion y menasa. Fiscal a bisa e acusado cu hamas por tin culpa riba un mucha di 16 aña cu a bay di acuerdo cu un abortus, siendo abo ta un homber adulto. Tampoco por bisa cu e mucha muhe mes tabata di acuerdo cu e relacion cu a dura dos aña. A señala declaracion di e denunciante aki, kende a bisa cu ora el a cuminsa nenga, Elvis a cuminsa dun’e placa. El a spaar esaki y asina cu el a cumpli 18 aña el a bay for di cas. Esaki ta demostra cu e tabata sinti su mes indefenso, manipula y no tabata mira cu por haya ayudo su so.
A base di tur esaki a pidi 12 aña di castigo y dia 11 di februari awo lo tin sentencia.