A.T.A. conhuntamente cu ATSA y socionan ta brinda training:

Cada persona trahando den e industria turistico tin influencia riba e experiencia y satisfaccion di e bishitante.

E ‘Education Foundation di Caribbean Hotel and Tourism Association’ den colaboracion cu Aruba Timeshare Association y otro socionan manera Aruba Tourism Authority, a ofrece 14 dia di training pa empleadonan den turismo, sigui pa e ricibimento di certificado.

Pa A.T.A. ta clave pa aporta na tipo di training mane esaki ya cu e trainingnan aki ta importante pa e desaroyo personal di cada participante, pa nan luga di trabao, pa e bienestar di nos industria turistico y ultimadamente pa e bienestar di Aruba, considerando cu nos ta depende asina fuertemente di turismo, un industria cu ta asina enfoca riba conexion y atencion humano. Cada persona trahando den e industria turistico tin influencia riba e experiencia y satisfaccion di e bishitante.

Yegando e fin di 2022, mester reconoce cu Aruba lo ta recuperando e cantidad di bishitante compara cu 2019. Adicionalmente, nos ta premira un crecemento den ‘tourism receipts’ na final di 2022, pues basicamente, turismo lo ta treciendo mas placa Aruba compara cu prome cu e pandemia. Esaki ta nifica cu e contribucion di cada un di nos ta generando fondonan adicional pa Aruba, algo cu tin un impacto positivo pa e bienestar di tur.

Cu e recuperacion actual y e crecemento na caminda como A.T.A., nos ta realisa cu e bishitante lo sigui cambia y lo bira mas exigente cada biaha, pues lo rekeri esfuerso adicional pa mantene e bishitantenan satisfecho. Drentando 2023 ta sumamente importante pa mantene e satisfaccion di cada bishitante, surpasa nan expectativanan y sigura cu nan ta bin Aruba bek pero tambe cu nan ta encurasha famia y amigonan tambe pa bishita Aruba. Pa A.T.A. e tipo di trainingnan aki tin un balor agrega pa por logra e metanan nos dilanti.