Ministerio di Cultura ta duna Ruthy Vrieswijk-Bergen un reconocemento pa su 50 aña den mundo di farandula
Diaranson 14 di december, Ruthy Vrieswijk – Bergen mihor conoci pa su nomber di artista ‘Lady Ruth’ a organisa su di tercer edicion di ‘E alegia di Ruthy: One Woman Show’ na Cas di Cultura. E ocasion aki tabata uno special pasobra Lady Ruth ta celebra 50 aña den mundo di farandula. E show tabata un homenahe na e amor cu Ruthy tin pa Aruba y Hulanda, pero cu un toke di Pasco. E publico por a disfruta di diferente presentacionnan di Lady Ruth den forma di poesia, canto y baile. Ademas, tabatin presentacionnan tambe di entre otro Wim Steenhuis, Amado Rosina, Antonieta Ras-Booi, Anna Veles, Mario Alberto Kelly, Vivian Lampe, Victor ‘El Duque’ Samuel y un bunita baile di tango.
Pa motibo di compromiso di trabao den Parlamento di Aruba, Minister di Cultura Xiomara Maduro no por tabata presente na e evento aki. Pero si pa medio di su representante, Ministerio di Cultura a otorga un reconocemento na e multifacetico Lady Ruth pa su trayectoria artistico largo y impresionante. Ruthy a dedica 50 aña na inspira, motiva, informa y trece alegria den nos pueblo atraves di su arte y creatividad. Minister Maduro kier a subraya e contribucion di Ruthy pa cu e herencia cultural di pais Aruba. Lady Ruth ta pintor cu a pinta cuadra y a participa na varios exposicion rond Aruba y tambe como poeta Ruthy a skirbi obranan den idiomanan Papiamento, Hulandes, Spaño y Ingles y a produci esakinan den forma di 6 CD y publicacion di 5 buki. Ademas di esaki Ruthy ta un escritor, e ta skirbi regularmente den corantnan local articulonan ‘Bon Dia – yen di alegria’ riba su experiencianan riba tereno social, cultural y literario. Lady Ruth ta conoci tambe pa su programa na radio ‘Dushi awacero musical’ cu e tabatin na Radio Kelkboom. Por ultimo, Ruthy a ricibi pa su tremendo contribucion na nos idioma Papiamento e premio literario “Tapushi Literario’ na nos isla ruman Corsou.
Minister Maduro kier a gradici Ruthy den nomber di Gobierno di Aruba pa e contribucion importante riba tereno literario y cultura di Aruba y pa semper a stima, kere y yuda promove cultura di nos Pais Aruba.
