Minister Dangui Oduber:ENTRANTE 1 DI JANUARI 2023 E UITKERING DI PENSIOEN DI BIEHES TA AUMENTA CU 5%

ORANJESTAD – Tabata na 31 di augustus 2022 cu Minister Dangui Oduber a anuncia aumento di uitkering di pensioen di biehes, e tempo ey esaki tabata poni na 3% cu e chens cu esaki lo por aumenta. Aña 2020 y aña 2021 tawata e añanan di mas dificil den historia di nos pais. Minister Oduber ta contento di anuncia cu esaki a keda aumenta aun mas na 5%.

Cu e aumento di 5% aki nos pensionadonan cu ta parehanan casa lo haya un aumento di 98 florin pa luna y pa pensionadonan soltero esaki ta un aumento di 58 florin pa luna.

E pandemia a pone retonan grandi nos dilanti como pais pero hunto den union pais Aruba a surpasa tur. Ora nos a kere cu situacion lo bira miho e guera na Ukraina a cuminsa y esaki a conduci na inflacion rond mundo y factornan externo cu tin hopi influencia riba Aruba.

Como e Minister encarga cu SVb, naturalmente tin cu pensa riba nos grandinan y con pa yuda nan den e presion cu inflacion a trece cune pa nan. No obstante tur e retonan di aña 2022, e aña aki ta uno excepcional pa nos turismo y economia. E recuperacion rapido di nos turismo y economia ta bayendo bon y ta danki na esaki Gobierno por aumenta e uitkering di pensioen di biehes.

Minister Oduber a indica cu manera tur cos ta bayendo Aruba lo sera aña 2022 cu un recuperacion di 100% di nos turismo den comparacion cu aña 2019. Esaki sigura ta un logro hopi grandi pa pais Aruba y e ta demostra e resiliencia di nos comunidad. Tur esaki a conduci cu tin espacio pa ahusta uitkering di pensioen di biehes.