Boto sospechoso ku droga interseptá

Ayera, 17 di desèmber, den oranan di atardi Wardakosta a detektá un boto sospechoso bayendo den direkshon di Kòrsou. Sentro di Operashon Maritimo (MOC) a lansa avion Dash imediatamente pa lokalisá e boto i a manda e boto di patruya Metal Shark-01 pa hasi e intersepshon. Miéntras ku e boto sospechoso a kambia direkshon i a kuminsa bai e kosta sùit di Boneiru.

E tim Multidisiplinario Maritimo Hub Boneiru (MMHB), un kolaborashon entre KPCN, KMAR, OLB, KWCarib i Douane pa manetene e fronteranan maritimo di Boneiru séif pa medio di un planifikashon konhunto, a manda e boto di patruya di Douane, ku un patruya di Wardakosta abordo, pa yuda ku e intersepshon. A hasi uso di esaki pa promé biaha i a resulta eksitoso despues di e promé biaha. Despues di un persekushon den awanan territorial di Boneiru, Wardakosta a disidí di tira riba e motor di e boto pa paga esaki. Duoane i Wardakosta a determiná ku e boto tabata kontené supstansianan probablemente narkótiko. E MS-01 a trese e boto sospechoso na e kosta di Boneiru.

Na momentu ku e boto a yega kosta di Boneiru, Kuerpo Polisial Hulanda Karibense (KPCN) a kuminsá un investigashon lokual a konfirmá ku enberdat ta trata di supstansia narkótiko. A konfiská un kantidat di 1280 kg di kokaina i a destruí esaki inmediatamente. A detene kuater persona en konekshon ku e kaso aki. Un hòmber di 29 aña di edat ku inisial R.G., un hòmber di 52 aña di edat ku inisial R.A.G., un hòmber 39 aña di edat ku inisial J.R. i un hòmber di 45 aña di edat ku inisial A.V. E kaso ta bou di investigashon.