Parlamentario Shailiny Tromp-Lee (MEP): Mike Eman y AVP mester stop di tuma pueblo haci

Durante tratamento di e ley pa loke ta trata e Plan Fiscal 2023, un biaha mas Mike Eman y AVP ta tuma pueblo haci. Durante tratamento di un ley asina importante y delicado, un biaha mas Mike Eman ta accentua e echo cu e la perde tur toke cu realidad. Mihor bisa, e kier pa pueblo lubida e realidad.

Den su desertacion Mike Eman ta keda subraya e necesidad di e pueblo, cual riba su mes ta na su lugar. Ainda nos pais ta pasando den momentonan masha dificil mes. Un realidad cu Gobierno di Aruba diariamente ta indica y sigur Fraccion di MEP constantemente ta subraya y duna atencion. Loke ta remarcabel ta e echo cu pa Mike Eman su Megadebe no ta existente, pandemia no a tuma lugar na Aruba, Aruba no a conoce un lockdown y a perde su entrada casi completamente y cu Aruba no mester a fia 914 miyon florin. Mas ainda Mike Eman no ta realisa cu mayoria pais na mundo ta luchando cu inflacion haltisimo, scarsedad di producto, crisis di energia etc.. Y cu e situacion di inseguridad mara na e guera na Europa ta haci e situacion aun mas dificil y insigur. Un realidad cu ken cu ta sigui desaroyo mundial lo scucha, lesa y wak cu mayoria pais ta den e mesun boto cu Aruba. Loke ta haci’e mas dificil pa nos ta e echo cu nos ta un pais asina chikito y tiki nos por influencia of haci al respecto.

Otro realidad cu Mike Eman no kier deal cu ne, ta e echo cu a bira momento pa cu orguyo nos cuminsa paga su Megadebe bek y mas cu claro tambe e prestamo realisa cu Hulanda pa por surpasa e pandemia. Ambos debe ta sumanan substancial cu mester keda paga. Corectamente Gobierno a presenta un Plan Fiscal caminda nan a sigui entre otro consehonan di IMF pa rebaha aun mas impuesto riba entradanan laboral y ganashi di companianan y aumenta impuesto riba consumo cual ta haci cu e grupo di turismo tambe ta contribui na dje.

Dia 18 di augustus 2022 Gobierno a dicidi pa pospone introduccion di BTW y pa aumenta BBO cu 1% pa por genera e entradanan necesario pa por maneha nos pais y cuminsa paga nos debenen. Dicon a dicidi esaki? Pasobra door di e aumento considerabel di inflacion (internacional y local) y e guera cu a start na februari di e aña aki cual a conduci na subidanan drastico y lihe di crudo (gasoline, diesel y LP gas) a haci cu nos como isla a keda poni den un estado hopi insigur y vulnerabel. Mester a tuma e decision cu lo ta miho pa e cartera di nos hendenan.

Mei mei di tur esaki, bo ta haya un Mike Eman y AVP cu ta kere cu e debenan cu e la crea lo evapora y tin e curashi di presenta un mocion y un amienda durante e reunion publico cual ambos nos por categorisa como popular. Ambos ta presenta sin ningun clase di seriedad y falta di tur clase di responsabilidad. Ami sigur no por a vota na fabor di e mocion y e amienda. Hopi lihe bo lo simpatisa e intencion y AVP sa esey. Asina nan ta tuma pueblo haci y hunga cu nan sentimentonan. Usualmente nos lo kier yuda esunnan mas vulnerabel mas cu ta posibel. Na lugar di por ehempel 45 florin na reparatietoeslag, nos tur lo tabata kier tin e posibilidad pa hisa esaki te na 300 florin, tambe aumenta bijstand cu 300 florin etc etc. Pero nos ta consciente cu no por, ni ta responsabel. Si tabata por e lo a keda haci! Pero un biaha mas nos mester conclui cu Mike Eman y AVP tin falta di seriedad y ta presenta mocion y amienda sin presenta na ki manera Gobierno lo mester paga esakinan y pio ainda sin indica na ki manera nan a yega na e suma di 300 florin pa e diferente toeslag of bijstandnan menciona.

E situacion financiero di pais Aruba ta delicado y e pot sigur ta limita. Nos mester atende cu ne debidamente y responsablemente. Nos no por crea debe of expectativa irealistico hungando cu sentimento di pueblo sabiendo cu bo sa cu no tin placa pa pag’e. Mike Eman mester siña cu no por duna loke no tin of sigui crea debe sin indica con ta bay pag’e manera e semper ta haci. Mike Eman y AVP mester stop di tuma pueblo haci.