Gobierno Noticia

Minister Glenbert Croes:Salario Minimo ta aumenta cu 78,06 te na AWG 1893,40

20 di December ta keda marca como un dia historico. Minister Glenbert Croes a firma e decreto cu ta declara cu salario minimo ta aumenta cu 78,06 florin. Di 1815,35 entrante 1 januari 2023 salario minimo ta yega te na AWG 1893,40.

E mandatario ta sumamente contento cu e decision aki tuma cu ta conta cu sosten absoluto di Gabinete Wever – Croes, un aumento cu ta conta tambe cu sosten di SER cu ta e instancia cu ta consisti di Gobierno, Sector Priva y Sector Sindical.

Advertisements

Aruba a pasa den temponan hopi dificil durante e pandemia. Danki na Dios Tata Todopoderoso y e maneho visionario di Gabinete Wever Croes cu Aruba a bin ta recuperando di un forma sorprendente y admirable. Esaki ta haci e aumento aki uno mas cu husto maske cu “nos no ta ainda unda cu nos mester ta pa por cumpli cu e bestaansminimum. Pero cu e aumento aki nos ta poco poco cerando e gap aki”, e mandatario ta declara.

Durante e acto di firmamento di e decreto, e mandatario a repasa e desaroyo di salario minimo di ultimo decadanan. Durante 8 aña di Gobierno di MEP, di 2001 pa 2009, MEP a aumenta salario minimo cu un total di 431 florin. Durante Gobierno di AVP, cu a goberna den añanan cu Aruba tabata den bonanza, AVP a aumenta salario minimo cu apenas 134 florin so, den 8 aña di gobernacion. Desde 2017 di existencia Gabinete Wever Croes 1 & 2, Glenbert Croes como Minister di Labor a percura pa den consulta cu SER y DAO, aumenta salario minimo cu un total di 216,06 AWG, den apenas 5 aña di Gobernacion.

Corectamente manera e mandataro a declara, lo sigui monitoria e situacion di cerca con e grado di inflacion lo continua, con costo di bida ta sigui aumenta, pa por empodera e homber y muhe cu tur dia ta lanta traha duro pa por duna su mes y su famia un bida husto y cu un miho porvenir.

Minister a probecha e oportunidad pa anuncia cu DAO lo ta trahando durante aña 2023 riba e ‘minimum uurloon’ pues un minimo di salario pa ora. Otro expectativa beneficioso pa e clase trahado pa 2024. Cu paso lento pero sigur ta dunando husticia na e mama y tata di famia cu ta traha duro tur dia pa un miho porvenir pa nan mes y nan yiunan.