Gobierno Noticia

Prome Minister Evelyn Wever-Croes:MINISTER PRESIDENT TA ANUNCIA MAS BON NOTICIA PA AÑA 2023

Na vispera di Pasco y ciere di aña 2022, ta pa Minister President di Aruba, Evelyn Wever Croes un berdadero privilegio di por anuncia y comparti cu nos pueblo mas bon noticia pa nos hendenan. Noticianan cu ta alentador demostrando e compromiso di Gobierno di Aruba, a pesar di tur e retonan, trahando incansablemente pa trece un miho porvenir pa nos Pais y nos hendenan.

“Minister di Labor a anuncia cu salario minimo ta bay aumenta entra prome di januari di 2023 cu 78 florin, esaki despues di a haya conseho di Departamento di Labor y di SER den cual tur gremio ta representa y cu a bay di acuerdo cu a aumento aki. Gobierno na su turno a aproba esaki”, prome minister a declara.

Advertisements

Pero e aumento aki so no ta e bon noticia. Ta diferente ta e decisionnan cu Gobierno di Aruba a tuma cu na final ta transmiti su mes den un adelanto mensual pa tur trahado. Aparte cu salario minimo ta aumenta, a dicidi di reduci impuesto riba salario. Tur hende ta bay paga 2%  menos na belasting y combina cu e aumento di salario minimo ta representa un adelanto significante pa nos hendenan cu ta traha dia aden dia afo.

Pa nos penshonadonan, nos hendenan cu a bin ta construyendo e cas Aruba cu awe nos ta bibando aden, pa nan tambe Gobierno di Aruba a anuncia un aumento di penshun di behez cu 5%. Ademas di e aumento aki, e reparatietoeslag tambe ta conoce un aumento di 40 florin pa penshonadonan.

Otro bon noticia ta cu e clase trahadonan cu su salario NO ta surpasa e suma di 30 mil florin pa aña, entrante 1 di januari 2023 lo no mester paga belasting riba su salario mas.

Decisionnan cu Gobierno a tuma, mirando e costo di bida halto debi na tur e retonan cu na nivel mundial ta bibando. Nos prome Minister  ta reconoce cu nos ta cerando un aña hopi pisa y cu tin hopi retonan financiero den hopi hogar aki na Aruba. Pero Gobierno ta traha incansablemente pa tuma decisionnan na bienestar di nos pueblo, pa por mitiga costo di bida halto pa e inflacion a causa di e guera entre Ukraina y Rusia cu a pesar di ta leu, toch a bati na nos porta tambe.

Tur e decisionnan aki acumuladamente ta represente un adelanto y mehoransa pa nos pueblo pasobra si nos pueblo progresa nos Pais lo prospera, tabata palabranan di nos prome Minister Evelyn Wever Croes.