MINISTER ENDY CROES A ENTREGA PREMIO DURANTE CELEBRACION DI 30 ANIVERSARIO DI DAMVERENINGING AROWAK

ORANJESTAD: Recientemente, Minister Endy Croes tabata presente na ocasion special, unda cu Asociacion di Dam di Aruba a celebra 30 aña di existencia. No solamente a celebra e hecho aki, pero a reconoce alabes dos miembro cu desde inicio a lanta e asociacion aki y tey keto bay activo como miembro di Arowak. Alabes a entrega premionan di campeonato di aña 2022.

Presidente di Club di Dam Arowak, Sr Ricardo Wever a inicia e atardi cual a tuma luga na Centro di Bario Tanki Leendert. Sr. Wever a yama tur su miembronan bonbini despues di a scucha e tononan di nos bunita Himno di Aruba. A sorpresa tanto sr. Rolin Croes y sr. Octavio Croes como e dos miembronan cu a inicia 30 aña pasa cu vereniging Arowak y te ainda ta activo den directiva y como hungado. Mesora a yama Minister Endy Croes dilanti kende a dirigi su mes cu algun bunita palabra felicitando Damvereniging Arowak cu nan 30 aniversario y a gradici tur cu a traha incansabelmente y otronan cu te cu awe ainda ta trahando pa Damvereniging Arowak. E Mandatario di Deporte a felicita dos persona cu a wordo reconoci unda a otroga nan dos bunita recuerdo. Por a tuma nota den publico presencia di un otro dirigente cu a lanta Arowak 30 aña sr. Enrique Jacopucci kende tabata presente, pero no ta activo mas. Minister Endy Croes na su turno a invita secretario nobo di ASU, sr. Jos Maduro pa hunto haci entrega di varios reconocemento. Despues a bay over na reparti diferente premio den diferente categoria. Sr. Ricky Nisbet ta e ganado absoluto kende a gana den diferente categoria tanto campeonato Nacional di Aruba y e campeonato Christmas rapid (sneldam). Tanto sr. Rolin Croes y sr. Octavio Croes tambe a logra di segundo y tercer luga den premiacion di dicho campeonatonan di 2022. Durante campeonato 2022, sra. Annelaine Jacobs no a logra competi den campeonato Nacional pero si a competi den campeonato internacional esta Pan Americano na Republica Dominicana na Republica Dominicana unda a logra di 4 luga cu ta un prestacion mas hopi halto. Sra. Annelaine Jacobs ta e unico persona na Aruba cu tin un titulo di Federacion Internacional MFF esta Master FMJD Femenine. Esaki ta e di tercer titulo di mas halto mundialmente cu e federacion ta otorga. Alabes por a presencia cu nos hobennan tambe ta competi den e deporte di dam y a conkista varios premio. Concluyendo  Minister Endy Croes ta manda palabranan di felicitacion na Asociacion di Arowak y ta desea  tur miembro y fanaticonan un bon dianan di fiesta y un aña 2023 exitoso.