Minister Rocco Tjon:MINISTERIO DI HUSTICIA Y ASUNTONAN SOCIAL TA SERA AÑA 2022 EXITOSAMENTE CU UN LOGRO GRANDI PA E TERENO DI CUIDO Y SALUD MENTAL

ORANJESTAD – Diamars mainta, durante un conferencia di prensa, Minister di Husticia y Asuntonan Social sr. Rocco Tjon a hiba palabra na momento cu Bureau Rampen Bestrijding Aruba (BRA) a firma un acuerdo cu AZV pa asina brinda cuido pa e clientenan cu tawata na e verblijfsafdeling di Respaldo. Banda di esaki tambe a firma un acuerdo entre Pais Aruba, Respaldo y Stichting Elizier cu ta bay hunga un rol sumamente importante den e cuido cu ta brinda na e clientenan aki.

Manera ta conoci ya pa algun tempo a lanta un “stuurgroep GGZ” cual ta encarga cu tres tarea. Nan tarea primordial ta pa yega na un miho structura pa loke ta e cuido di salud mental na Aruba, pero banda di esaki nan ta maneha proyectonan y den e proyecto specifico aki e stuurgroep lo bay tin un rol importante tambe pa keda monitorea esaki y percura cu e cuido cu ta wordo brinda, ta uno adecua. Ademas di esaki, tin diferente gruponan di trabou cu ta traha riba ehecucion di e roadmap cu tin pa loke ta salud mental na Arub.

Bisando esaki, diamars mainta a firma e acuerdo entre BRA y AZV, caminda ta bay cambia e manera con e “langdurige klinische GGZ” tawata wordo brinda anteriormente, den uno caminda ta bay crea e condicionan bou cual nos conoce como “beschermd wonen”. Ta trata di un cuido cual profesionalnan mes ta indica cu ta mas na su luga pa e clientenan aki, mirando cu e comision di indicacion, a inidica cu e clientenan of pashentnan aki tin un “sociale indicatie”. Pues, e cuido cu ta bay wordo brinda bou di e capa di “beschermd wonen” ta mucho mas miho pa cu e clientenan aki.

E mandatario a expresa cu por bin e pregunta “pakico gobierno di Aruba ta haci esaki awo”, pa contesta esaki, a splica cu manera ta conoci algun luna atras, a traves di algun medionan di comunicacion a lanta ful un discucion pa motibo cu a cera e “verblijfsafdeling” di Respaldo. Gobierno di Aruba, semper a inidica cu lo laga esaki sosode solamente na un manera responsabel, pa cual motibo e diferente gruponan di trabou a percura pa yega na un solucion a corto plaso. E solucion a corto plaso ta un acuerdo entre Pais Aruba, Respaldo y Stichting Elizier, como tambe e acuerdo entre BRA y AZV, mientras ta trahando riba e solucion a largo plaso. Specificamente lokual a wordo firma ta e posibilidad pa e clientenan cu tawata na e “verblijfsafdeling” di Respaldo por wordo ubica na Stichting Elizier, y banda di esey e fondonan necesario a traves di AZV ta wordo aloca tambe pa por crea e condicionnan adecuado teniendo na cuenta e parti di siguridad como tambe e parti di e cuido. Profesionalnan lo bay wordo emplea pa asina asisti Stichting Elizier pa brinda e cuido necesario, di cual Respaldo tambe tin un rol den esaki, pa loke ta e “ambulante zorg” cu lo keda wordo brinda entre otro atraves di e fact team.

Segun minister Tjon, ta trata di un inversion di alrededor di 776 mil florin cu ta bay wordo hinca den cuido pa por brinda e cuido adecua na e clientenan. E mandatario a gradici e stuurgroep GGZ, pa e trabou cu nan a bin ta ehecuta, pa cual sin e esfuerso aki nada di esaki no lo tawata posibel. Tambe a gradici BRA y AZV kende ta e partners cu lo bay keda encarga cu e proyecto aki pero tambe kende lo percura pa monitorea e trayecto di esaki, pa asina e fondonan cu ta wordo aloca, wordo uza na un manera eficiente y eficaz. Por ultimo, a gradici Stiching Elizier pa e confiansa den e proyecto aki y cu a tuma e reto aki pa asisti den brinda un miho cuido na tur esnan cu tin mester di dje.