Prome Minister Evelyn Wever-Croes: GOBIERNO TRAHANDO RIBA FORTIFICACION DI APARATO GUBERNAMENTAL

Destaho publico a keda publica

Recientemente Prome Minister di Aruba, Sra. Evelyn Wever-Croes a anuncia cu e proceso pa restructura aparato gubernamental a cuminsa. E  meta ta pa e aparato publico bira mas agil y automatisa pa asina baha e gastonan di personal y eleva calidad.

Den cuadro di e trabounan cu Aruba ta eherce relaciona cu e pakete di reforma di Landspakket, recientemente a keda publica e destaho publico.  E destaho aki ta enfoca riba tema B di Landspakket cu ta encera efectividad di sector publico y specificamente riba realineacion di e tareanan clave di Pais  Aruba. Cuminsando 2023 e reorganisacion y alineacionnan di aparato gubernamental lo inicia, financia pa Hulanda y bou guia di Departamento di Recurso Humano DRH conhuntamente cu Tijdelijke Werk Organisatie (TWO) Aruba y Hulanda. E meta ta pa yega na un aparato eficiente y eficaz.

E aparato gubernamental di Aruba ainda ta confronta diferente ‘bottlenecks’ cu ta stroba su eficacia y agilidad den ehecucion di trabounan. Tardansanan innecesario cu por hasta yega te na stagna economia di nos Pais. Gabinete Wever-Croes 2 ta tuma e curashi y ta asumi e responsabilidad di por transforma nos aparato gubernamental den uno servicial, eficiente y eficaz. Nos Pais su progreso y desaroyo ta depende di un aparato gubernamental cu ta funciona optimalmente.

E proceso aki lo dura 9 luna cu e posibilidad di por wordo extendi. E Proyecto aki ta wordo considera un Proyecto ambicioso cu lo conduci mas aun na reenforsa e sector publico di Pais  Aruba y asina mehora e calidad di servicio publico.

Por haya tur informacion relaciona cu e destaho publico aki riba e siguiente link: https://www.tenderned.nl/aankondingen/overzicht/283822/details