Booshi Wever: CERAMENTO DI DUMP UN OTRO “SPROOKJE” Y KEN TA BAI PAGA PA ESAKI!

 Dia 31 di december 2022 cu un tremendo show a pone heki pa mustra comosifuera cu e dump na Parkietenbos a cera por completo. Nos tur sa cu esaki NO ta cuadra cu e realidad. Dicon? Ainda e porkeria di e incenirator chikito ta sporadicamente den operacion, e “medical waste” y e cadavernan keto bay ta bay riba e dump na Parkietenbos. A cambia unda mester tira e desperdicio, siendo den e ley di Serlimar 2005 ta bisa cu esaki mester sosode por medio di un MB. Cual MB porcierto no a publica ainda. Loke ta hopi peculiar ta e hecho cu ta cera e dump na Parkietenbos pero ta laga e dump na Sero Teishi habrí, cu ta ni 500 meter pariba esun existente. Pero ta keda boca cera riba e hecho cu e dump aki ta produci un holor insoportabel y ta sumamente toxico. Dicon tur hende ta keda keto riba esaki? Acaso e holor aki no ta malo a salud pa e habitantenan? Of cu esey no ta “give a damn” mas??

Loke si ta un FACT ta e hecho cu prijsnan a subi sin misericordia. Djis pa ilustra un paar di ehempel mi kier a duna e prijs cu ta wordo cobra. Y ainda no ta tur prijs a wordo calcula exacto.

REALIDAD:

* Prijs di Green Waste a subi di Afl 18 per ton pa afl 128.40 per ton (si esaki ta mas cu 1x pa siman y prijs pa loke rosa tereno); UN AUMENTO DI MAS DI 700%!!!

 * Prijs di Mixed y Bulk Waste di Afl 60 ton pa afl 192.60; UN AUMENTO DI MAS DI 310%!!

Ya caba nos ta mira cu prijs di baki di sushi a conoce un aumento drastico. Tabata cobra 250 florin awor ta cobra 655 florin pa un baki di 20 ton.Cu otro palabra di e 655 florin ta 1/4 so ta pa e compania di baki, e resto ta pa e compania di procesa y bbo. E companianan di baki y dumptruck a practicamente bira trahado di e compania cu ta tuma e sushi cu al final lo mester cera su portanan!!

Si nos tuma nota di loke mester ser paga pa e ton(128 florin), rosamento di tereno pa traha cas lo bai conoce un aumento considerabel. Pues a cera e dump sin importa kico esaki kiermeen pa e cartera di pueblo cu ta esun al final lo mester bai paga pe.

Den e lista ta para cu “bouwafval” ta gratis. Ken ta haya e “afval” aki? Kico ta ser haci cu esaki? Cuanto florin e pueblo ta haya di esaki? Ta recycle esaki pa traha algo cune? Cu otro palabra “trash2cash” ta algun previlegiado lo benificia di esaki atrobe. Ta haci comosifuera cu den “trash2cash” e sushi lo genera entrada. Pero e sushi no ta genera entrada pa esun cu entrege. E ta genera entrada pa esun cu tume paso pueblo mester paga ora entrega e sushi. Aki a minister ta usa palabranan bunita y grandi manera “circular economy” sin duna un bon splicacion. Pasó loke ta bai sosode ta cu di e desperdicio tin algun cos ta wordo saca y rebende sin cu pueblo ta mira algo di dje(p.e. bouwafval) pero e gran mayoria ta wordo poní den bales y ta simpelmente wordo dera(sin liners) cu ta produci un holor insoportabel y toxico. Esaki ta un economia circular cu e pueblo mes no ta benificia di dje?? Y minister su reaccion ta uno caotico unda hasta awor ta menciona den su entrevistanan cu ta mira kico por bay haci y pesey lo bay papia cu e compania di Waste Away (lesa Bouldin & Lawson) wak kico nan por nifica.

 Pues ta un SPROOKJE atrobe cu ceramento di Dump ta e solucion! Dicon semper ora ta trata e compania poderoso aki tur hende ta keda keto? Un “SPROOKJE” cu te hasta ta pone full Parlamento, sindicatonan, gremio comercial y te hasta prensa keda keto of nan a haya “HUSHMONEY” pa no bisa nada?