Minister Dangui Oduber: ARUBA A RICIBI MAS DI 610 MIL TURISTA CRUCERO DEN AÑA 2022
ORANJESTAD – No ta un secreto cu aña 2022 tabata un hopi bon aña pa Aruba su Turismo! E tabata un aña cu a cuminsa poco slow door di COVID, pero asina cu Gobiero a anuncia nos Exit Strategy cu a resulta un hit tur cos a cuminsa cana pa mihor. Den aña 2022 nos a surpasa tur proyeccion pa locual ta e recuperacion di nos turismo.
Turismo crucero no ta un excepcion, aki tambe nos a surpasa locual a wordo proyecta y na final di aña 2022 Aruba a ricibi un total di 610.474 turista crucero. Esaki tabata un recuperacion di 73.4% den comparacion cu aña 2019.
Esaki sigur ta un excelente recuperacion despues di 2 aña di pandemia. Den aña 2022 Aruba a ricibi varios calls pa prome biaha di Mega Cruise Ships. Esaki a bira posibel despues di e inversion grandi cu a wordo haci pa draga na nos waf pa asina por acapara nan. E mega cruceronan aki ta yega nos isla cu mas di 5 mil turista y ta trece hopi actividad economico pa nos isla cune. Tabata tin dianan cu tabata tin 4 barco crucero mara na nos waf y mas di 10 mil hende den Oranjestad.
Finalmente Minister Oduber a duna di conoce cu aña 2023 lo ta aun un mihor aña pa Aruba su turismo. Pa nos turismo crucero ta premira cu lo ricibi alrededor di 810 mil turista den aña 2023.
