Minister Dangui Oduber: PROYECTO SCOL SALUDABEL PRONTO LO WORDO AMPLIA

ORANJESTAD – Diamars atardi Minister di Turismo y Salud Publico sr. Dangui Oduber a reuni hunto cu Minister di Enseñansa sr. Endy Croes, Jeugd Gezondheidszorg, Sociale Zaken y Directie Onderwijs. Aki Minister Oduber a haya un presentacion di e programa di scol saludabel. E programa di scol saludabel ta forma parti di e plan nacional di prevencion, e mandatario a categorisa aña 2023 como e aña di prevencion den salud publico.
Minister Oduber ta recorda comunidad cu Aruba tin un plan nacional di prevencion di e malesanan no transmisibel desde 2020. Aruba a logra traha e plan nacional di prevencion cu ayudo di tur stakeholders akin a Aruba y cu e guia di “Pan American Health Organization” (PAHO). Aruba ta un di e poco paisnan den Caribe cu tin un plan nacional di prevencion. E plan aki mester a bay na vigor na aña 2020 pero lamentablemente Aruba a haye confronta cu e pandemia na maart 2020 y tur cos frena. Awor na aña 2023 e plan nacional di prevencion ta bay den efecto full speed pa keda ehecuta segun e mandatario.
Prevencion den salud ta di vital importancia pa por mehora e calidad di bida di nos comunidad. E mandatario ta kere den campañanan di prevencion caminda ta percura pa tur cuidadano hiba un bida mas saludabel. Pa nan tene na cuenta locual cu nan ta consumi y pa tin un sociedad cu ta haci nan ehercicionan diariamente y tambe ta haci na chekeo mediconan na tempo.
Den cuadro di esaki scol saludabel ta importante pa nos conscientisa, educa y brinda tur e informacion necesario na nos muchanan ya desde chikito caba. Nos lo bay educa nos muchanan desde kleuter y basis caba con importante e ta pa nan cuida nan salud. Minister Oduber a expresa cu e ta sostene e iniciativa y pa es motibo Ministerio di Salud Publico ta e iniciador tambe di e proyecto aki. Di e manera aki ta bay purba amplia e cantidad di scolnan cu ta participando na scol saludabel.
E intencion ta pa na aña 2023 redobla e cantidad di scolnan cu ta participando na scol saludabel. Pa esaki bira posibel dentro di poco lo bay firma un decreto ministerial entre Ministerio di Salud Publico, Ministerio di Enseñansa, Ministerio di Asuntonan Social conhuntamente cu tur e departamentonan cu ta forma parti di e proyecto di scol saludabel. Despues di esaki lo tene un conferencia di prensa hunto pa asina presenta e concepto di e programa na comunidad.
Den e siguiente fase lo bay sinta cu tur e dirigentenan di e scolnan pa presenta esaki. Nos ta conta pa asina haya nan compromise pa nan participa activamente na e programa di scol saludabel. Esaki sigur ta un bunita proyecto cu e meta pa tin un comunidad mas saludabel y pa mehora e calidad di bida cuminsando na nos muchanan.
Minister Oduber ta contento di por a reuni cu e plataforma pa asina cuminsa prepara e programa aki pa asina por presenta esaki pronto na nos comunidad y e dirigentenan di scol pa asina mas scol por paticipa tambe.