Cambio di ley di overbruggingsuitkering proponi pa Gobierno no ta costa pais Aruba mas placa

Parlamento a ricibi di Gobierno un revision di e ley “Lv voorziening gewezen politieke ambtsdragers” na december ultimo na unda diaranson cu a pasa Parlamento por a haci pregunta riba e cambio presenta. Segun Parlamentario Setty Christiaans-Yarzagaray articulo 4 di e ley ta bisa cu momento cu politico baha di su funcion e por apela pa un overbruggingsuitkering pa evita un caida drastico y abrupto den entrada bou cierto condicionnan.

 

Esencia di e ley ta cu un ex-politico por cay den un bashi momento cu tin su gastonan mensual y por apela pa un overbruggingsuitkering cu ta 80% di su entrada mensual pa un periodo te cu un aña. Momento cu e ex-politico haya trabou of tin su trabou anterior bek (den caso cu e ta un ambtenaar), e por cobra ainda e diferencia entre su entrada como politico tanten cu e entrada aki no ta surpasa loke e tin derecho riba dj’e pa un periodo di un aña. 

 

E cambio cu Gobierno ta desea pa introduci na e ley ta un cambio minimo cu ta regarda articulo 19. E cambio aki ta trata e momento cu por cuminsa cobra e overbruggingsuitkering. Na e momentonan aki segun e ley por cuminsa cobr’e dia 1 di e luna cu ta sigui despues di terminacion di funcion como Parlamentario of Minister. Si aplica e ley manera cu e ta e esencia di e ley cu ta “overbrugging” no ta sirbi e proposito inmediatamente. E cambio sugeri pa Gobierno ta pa e pago tuma lugar e dia despues di e ultimo dia den funcion di e ex-politico pa evita cu e cay den un bashi. 

 

E cambio cu ta wordo introduci no ta causa extra placa pa pais Aruba. E diferencia ta cu lo paga algun dia anterior cu e prome dia di e siguiente luna pero pago di e overbruggingsuitkering ta termina tambe e ora prome. Na final e suma total cu lo paga e ex-politiconan cu tin derecho riba dj’e y a haci apelacion riba dj’e ta e mesun cantidad.

 

Contrario na impresion cu opositornan politico ta purba di duna pueblo cu esaki ta mas gasto of cu ta duna e ex-politico algo cu e no tin derecho riba dj’e no ta cuadra. Si paga overbruggingsuitkering desde prome dia di e siguiente luna cu den e ultimo caso tawata 1 di augustus of paga dia 8 di juli, lo e pagonan termina 1 di augustus of bek 8 di juli di e siguiente aña. Pa aña 2021 e por ta haci un diferencia chikito cual lo wordo balansa bek den 2022 of andersom den e caso cu aplica e ley anterior manera ley ta prescribi. Al contrario, e personanan cu ta cobrando overbruggingsuitkering na e momentonan aki ta hasta wordo paga 80% riba e 75% di bezoldiging tumando na cuenta cu salario di Parlamentarionan y Ministernan ta corta desde COVID-19 cu 25% y ley ta bisa cu overbruggingsuitkering ta wordo paga riba “laatst genoten salaris”.

 

Parlamentario Setty Christiaans-Yarzagaray lo keda pendiente pa e fecha pa tratamento di e ley aki pa asina ricibi contestanan riba preguntanan cu e su persona a haci y alabes pa asina sigui brinda pueblo e informacion manera mester ta y no manera opositornan politico kier bende, sabiendo ademas cu tin miembronan di nan mes partido of ex-partido ta cobrando overbruggingsuitkering.