Parlamentario Gerlien Croes:Pueblo ta pagando pa loke Prome Minister a firma cu Hulanda

Despues di celebracion di fiestanan di fin di aña y tambe apertura di carnaval 2023, ta bon pa  pueblo keda cu atencion riba e forma con Aruba a bin ta wordo goberna pa ultimo añanan.

Parlamentario pa fraccion di AVP, Gerlien Croes a mustra cu ta di vital importancia pa pueblo sigui tur desaroyo cu tin y cu ta bin for di gobierno sigur pa un serie di medida (fiscal) cu a wordo introduci net prome cu Pasco y fin di aña.

“Ta hopi importante pa nos tuma nota y tene na cuenta di kico ta e realidad cu nos ta bibando aden na e momentonan aki.  Mi tin cu informa pueblo, despues di a ricibi varios pregunta riba e fecha cu BBO lo subi, cu e cambionan aki a wordo pasa net prome cu Pasco y cu e cambionan aki a drenta na vigor caba.

Hopi persona a tuma nota di e cambionan di prijs caba, algun lo tuma nota di esaki fin di luna(nan) venidero y e ta preocupante ora cu nos realisa  y nos tin cu recorda pueblo, di con e situacion cu nos ta aden ta actualmente.

Aruba y mundo henter a confronta un situacion dificil c’un pandemia pero ta bon pa recorda pueblo cu tin un Minister President  y su gobierno cu a dicidi cu nan ta firma un acuerdo cu Hulanda, asina yama “Onderlinge Regeling”  un Landspakket, y No a negocia pa Hulanda saca placa y haci  reforma nan cu nan ta desea  of ta pensa cu tin cu wordo haci, caminda tin cu busca awor pa pueblo paga pa tur loke Minister President a firma p’e awe.

Subi BBO, subi prijs di coriente, subi prijs di awa, bida ta casi impagabel y gobierno ta haci mescos cu bida ta sigui normal den Cocolishi.”

Parlamentario Gerlien Croes a sigui mustra cu pa gobierno “the show must go on” den Cocolishi tambe ya cu ta habri aña 2023 caminda Parlamento ta haya notificacion dialuna cu Minister President ta bay reuni cu Hulanda na Sint Maarten pa atende cu e punto di “democratisch deficit” y con por cambia e forma pa e islanan por wordo miho representa den Parlamento na Hulanda.

“Minister President ta lubida cu na e momentonan aki, na Aruba mes nos ta sufriendo di un ‘democratisch deficit’ ya cu na Aruba nos tin 11 persona den Parlamento kendenan ta bay di acuerdo pa sigui pone tur medida riba lomba di comunidad y lomba di comercio, pa colmo nan no ta realisa cu nan ta kibrando economia di Aruba y futuro di e pais aki  

Dia 25 di December, esta Pasco, ta sali publica riba websitenan di gobierno Hulandes cu pa medio di un ‘aanbesteding’ ta buscando un compania bin haci un ‘onderzoek,’ y bin haci reforma  necesario den   e aparato gubernamental di Aruba.

Cu mester bin reforma casi tur hende ta di acuerdo cu esaki pero Pasco merdia ta sali e aanbesteding  den cual ta wordo informa cu Hulanda ta responsabel pa e aanbesteding pero cu pais Aruba via di Minister di Algemene Zaken, esta Minister Presidente ta esun cu tin cu duna e ‘opdracht.’

Pues pa loke Minister Presidente Evelyn Wever Croes a firma cu Hulanda algun aña pasa, na final di dia ta pueblo mes tin cu bay paga pa haya e solucionnan cu Hulanda ta propone siendo cu e mes ta para un banda y ta mira con pueblo tin cu sacrifica pa tur su decisionan y fabornan pa su mes y esnan rond di dje” Parlamentario Gerlien Croes a declara.