Parlamentario Ricky Hoek (MEP):Presupuesto 2023 di TPEF y DOW lo keda trata otro siman

Dos ley cu lo beneficia Aruba

Proximamente Parlamento di Aruba lo trata dos ley di presupuesto. E dos leynan ta encera e presupuesto 2023 di e Tourism Product Enhancement Fund (TPEF) y e presupuesto 2023 di Dienst Openbare Werken (DOW).

E dos leynan aki lo keda trata den e siman di 16 di januari benidero. Segun e planificacion di Parlamento di Aruba, lo trata e ley di TPEF riba dialuna 16 di januari y esun di DOW riba diahuebs 19 di januari 2023.

Inversionnan di TPEF

E fondo di mehoracion di producto turistico tin diferente categoria den cual e ta inverti. Entre otro den medio ambiente, atraccion turistico, cultura & herensia, investigacion & desaroyo y contingencia. E inversionnan pa 2023 ta entre otro den mantencion y mehoracion di e strip di Eagle Beach. Tambe lo construi un ruta di cana for di Marriott Hotel te cu Palm Beach Plaza. Banda di esey, e TPEF lo inverti den cultura y herencia caminda lo bay traha na e mantencion di diferente museo riba nos isla.

Inversionnan di DOW

Manera ta e meta di DOW, ta pa construi caretera y mantene e infrastrtuctura di pais Aruba. DOW ta enfoca entre otro tambe riba habri caminda pa construccion di parcelanan nobo y mantencion di e sistema di riolering. Den 2023 DOW lo bai enfoca na reconstrui e caretera(nan) dilanti di e hotelnan grandi. Esaki lo sosode den fase pa asina mantene e fluho di trafico. Di e forma aki DOW lo bai mehora e caretera cu ta wordo usa tanto door di e empleadonan den sector hotelero, taxistanan, bishitantenan y nos localnan. Banda di e area turistico, DOW lo bai pone algun caretera di asfalt nobo den algun bario rond di nos isla.

Beneficionan pa Aruba

Tratando y aprobando e dos leynan aki den Parlamento, Aruba lo bay beneficia di un calidad mas halto di e producto Aruba. Esaki ta haci cu tanto nos bishitantenan y nos localnan lo por sigui bishita nos museonan y haci uso di areanan turistico of por bisa tambe areanan cerca di lama cu ta ofrece ruta pa cana y careteranan den bon condicion.

Gobierno di Aruba a proclama aña 2023 como Aña di Union y Positivismo. Y den cuadro di esaki, nos tur lo sigui traha hunto na e reconstruccion y desaroyo di nos pais Aruba den un forma positivo.