Parlamentario Marco Berlis (MEP): COHO ta storia di pasado!

Siman cu a pasa Minister President di Aruba, sra. mr Evelyn Wever-Croes hunto cu minister presidentnan di Corsow y Sint Maarten a reuni cu ambtenaarnan di Hulanda y sra. Secretario di Estado Alexandra van Huffelen riba e tema di COHO. COHO tabata e curpa cu mester a supervisa tur e trabaonan di landspakket di e tres paisnan aki, cu mester a wordo ehecuta y estableci segun e diseño acorda. E reunion di e Minister Presidentnan y Hulanda a culmina den e decision pa bari COHO for di mesa. Mi ta aplaudi e tremendo trabao y logro aki di nos prome minister Evelyn Wever-Croes. COHO mester ta e prome paso pa elimina Hulanda su influencia y autoridad riba nos autonomia. Mientras tanto ta sigui na mesa pa duna contenido na e acuerdo cu lo forma un onderlinge regeling cu lo sigur bon pa Aruba y e otro dos paisnan den reino.

Ta pesey e hecho cu awor COHO ta for di mesa ta un logro grandi pa pueblo di Aruba. Nos Libertador Betico Croes, a lucha pa por duna Aruba su Status Aparte.  Aruba semper a lucha y ta kere den su Status Aparte y lo haci. Awor cu Aruba ta recuperando, a demostra cu nos por para riba nos propio pianan. Nos pais ta recuperando fuertemente y a presenta un presupuesto cu un surplus di 1% pa e aña aki 2023, cual hecho a fortalece e confiansa entre Aruba y Hulanda. Hulanda ta wak e seriedad di nos gobierno, e disciplina y vision cu a wordo desplega y ta mustra esaki constantemente ora cu a dicidi pa no bin cu un KB y awor ta dicidi pa bari e COHO for di mesa pa semper.

Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!