Parlamentario Alvin Molina (MEP): Big Mama Grill: 25 aña na Baby Beach

E no tabata un caminda facil. Ainda por corda con papa Gi Raven a cuminsa 25 aña pasa cu un par di “beach chairs” pa huur cu turista. Awe Big Mama Grill ta un restaurant renombra, unda cu nos bishitantenan di rond mundo por gosa di platonan completo, refresca e garganta na bar y huur “beach chairs y cabanas”; asina sra. Loutiza Raven, yiu di sr. Gilbert Raven a cuminsa splicami. Loke ta bunita di e testimonio aki ta pa mira con un yiu di tera, por a cuminsa un negoshi na un manera humilde door di traha duro ycu  hopi esfuerso, por a logra un proyecto grandi y renombra na un di nos beachnan di mas famoso. Website manera Tripadvisor ta pone Big Mama Grill den e top 5 di restaurantnan pariba di brug. Espacio pa mehoracion tin semper, esey ta conta tambe pa e servicio duna door e negoshi di famia aki. Pa algun aña Big Mama a introduci un prijs special pa localnan tambe por saboria e platonan na Baby Beach.

Durante fin di siman mi a bishita Big Mama Grill pa pone mi mes na altura di e ultimo sucedido. Algun dia pasa Big Mama’s Grill a ricibi bishita di un representante di DIP, cu ta controlando si permisonan di e restaurant ta na ordo. Sra. Raven a expresa cu e ta compronde cu DIP tin e trabou pa controla, pero di otro banda nan ta wardando DIP pa añas caba pa por renoba permisonan di e restaurant cu tin mester pa sigui draai e negoshi, pero lamentablemente sin por haya contesta di DIP.

Mi ta urgi e mandatarionan concerni pa hunto cu nan departamentonan, inventarisa ki formalidadnan falta pa wordo regla y na ki manera nan por wordo sanea. E meta mester ta pa sondea na ki manera e compania Arubiano aki cu a cumpli 25 aña di existencia, por continua brindando e servicio na tanto local como nos bishitantenan, y asina nos por sigui gosa optimalmente di nos bunita Baby Beach.