Minister di Cultura ta presenta dos programa informativo tocante UNESCO Aruba

Den luna di november 2022 Unesco Aruba a conmemora 35 aña cu Aruba a bira miembro asocia di United Nations Educational Scientific and Cultural Organization, UNESCO.

UNESCO ta e organisacion di Nacionnan Uni cu ta traha riba tereno di educacion, ciencia, cultura, comunicacion y informacion. Pa alinea e trabounan di UNESCO pa Pais Aruba a institui un Comision Nacional pa UNESCO. Minister Xiomara Maduro ta informa cu pa prome biaha Aruba tin un Secretariado formalisa cu e posibilidad pa nombra un specialista pa cada un area di trabou di UNESCO.

Pa duna un bista con UNESCO Aruba ta funciona y con e ta implementa e programanan di UNESCO, e dignatario ta presenta dos programa informativo na television tocante UNESCO Aruba. Den e prome programa e Secretario General di Comision Nacional UNESCO Aruba, sra. Marushka Tromp hunto cu e expertonan di e Secretariado lo hiba palabra. sra.Nora Eleonora, specialista di educacion, sr. Marck Oduber, specialista di ciencia, sra. Ruby Eckmeyer, specialista riba tereno di ultura lo duna un splicacion tocante e meta di tereno di experticio. Alabes sr. Peter Scholing, Presidente di ‘Memory of the World’ (Mowlac) lo brinda informacion  tocante di e programa di Mowlac.

E mandatario ta informa cu e prome programa tocante UNESCO Aruba lo pasa diaranson dia 18 di januari, pa 7’or di anochi na Tele Aruba y 8’or di anochi na Diario TV.