MINISTER MADURO TABATA PRESENTE NA E LANSAMENTO DI E PROYECTO DI EMBEYECEMENTO DI E STRIP DI EAGLE BEACH

Un bunita proyecto cu ta tipifica ‘union y positivismo’

Diamars cu a pasa, den presencia di diferente mandatario, parlamentario, stakeholders y demas invitado, Minister di Turismo, Dangui Oduber, hunto cu Minister President y representantenan di e hotelnan riba e hotelstrip di Eagle Beach, a firma un MOU pa asina cuminsa cu e proyecto pa embeyece e area di Eagle Beach.

E proyecto ta encera un colaboracion entre Fondo di Tourism Product Enhancement Fund (TPEF), Aruba Tourism Authority (ATA) hunto cu e hotelnan situa riba e strip di Eagle Beach, unda lo percura pa embeyece y mantene e area di Eagle Beach bunita pa tur usuario. TPEF y ATA lo financia e inversion y e hotelnan riba e strip cu ta cuminsa for di rotonde di Amsterdam Manor te cu e rotonde di Alhambra, lo percura pa e mantencion. 

Minister di Finansa y Cultura, Xiomara Maduro, tabata presente pa asina presencia e firmamento aki cu a haci e proyecto uno oficial. ‘Sigur un bunita proyecto cual no solamente turistanan cu ta bishita nos isla lo disfruta, pero sigur tambe nos habitantenan lo sa di aprecia e embeyecemento aki. Esaki ta cuadra tambe cu nos lema pa cu e aña aki di union y positivismo caminda cu bo ta wak con ora cu sector publico y priva uni, ta cosnan positivo ta sali for di e union aki’ tabata palabra di Minister Maduro na e ocasion aki. 

E mandatario ta felicita Minister Dangui Oduber y ta gradici e board di TPEF, ATA y e hotelnan pa e bon colaboracion pa un proyecto na bienestar di Aruba.