Pasonan a wordo tuma y lo sigui wordo tuma pa salvaguardia nos medio ambiente

Riba dialuna 31 di januari 2022, Parlamento di Aruba a trata un Reunion Publico cu a keda yama pa fraccion di MAS y Accion 21 pa trata e rapport ‘Coral Reefs Baseline Study for Aruba 2019’.

 

E rapport a keda skirbi pa e management di ‘Caribbean Research and Management of Biodiversity Foundation (CARMABI) pa duna un bista di con e status di e coralnan na Aruba ta.

 

Den calidad di Parlamentario, esaki ta e momento cu lo mester tuma accion pa salvaguardia e bida marino rond di nos isla. Den e rapport CARMABI ta bin algun aspecto dilanti manera por ehempel e calidad di coralnan, e tipo y cantidad di piscanan, e calidad di awa, etc. Tambe ta menciona den corto e parti legislativo cu lo mester bin. Ta den e cuadro aki, como Parlamento lo mester trata kico ta e cuadro legislativo den cual nos mester por continua na brinda tanto nos localnan y turista e oportunidad di disfruta di nos bida marino, sin cu e hendenan tin un impacto negativo riba nos medio ambiente. Pa garantisa un bida marino sostenibel, lo mester haci un encuesta mas extenso tanto na parti nort y zuid di e isla y bin cu un codificacion di zona manera cu ta wordo usa na isla ruman Boneiro.

 

Pa agrega, den un Encuentro Publico (‘Openbare Bijeenkomst’) riba diahuebs 27 di januari 2022 Parlamento a ricibi un presentacion di Minister Ursell Arends y e expertonan di DOW y DNM tocante nan plannan pa e mantencion y actualisacion di e plantanan di rioolwater-zuiveringsinstallatie (RWZI). Den e reunion aki tur miembro di Parlamento tabata tin e oportunidad pa a haci pregunta di contenido na cada experto presente. Asina mi persona a puntra e expertonan lo siguiente:

–   Si DOW lo por indica kico ta e ‘time-frame’ den cual e mantencion y upgrading di e planta di RWZI na Bubali lo mester keda ehecuta.

–   DOW, DNM y Parke Nacional Arikok ta mira e balor agrega pa duna un presentacion na pueblo tocante e asunto aki pa asina pueblo ta bon informa pa su expertonan y no politiconan y asina pueblo por compronde e importancia di contribui na un bida sostenibel riba nos isla?

–   Ken ta e actornan cu lo mester bin cu un beheersplan pa mantencion di Bubali Plas y e flora y fauna den y rond di dje? Tin un idea y sugerencia den forma di un timeframe cu lo kier bin cu e beheersplan?

–   Minister Arends a menciona cu a aloca un suma di 16 miyon florin disponibel riba presupuesto 2022 pa mantencion di RWZI. Pregunta ta cu si tin un plan of maneho financiero structural cu lo por garantisa mantencion di tanto e sistemanan y e inversionnan cu a caba di wordo haci y cu lo yuda durante e transicion pa yega na e sistema nobo?

–   Den e presentacion a keda menciona cu lo tene cuenta cu e modelo di economia circular. Mirando cu globalmente sostenibilidad (a menciona tambe e SDG’nan), tanto DOW, DNM y Gobierno a sinta hunto caba y bin cu un plan of vision pa futuro con lo traha abase di e concepto y modelo di economia circular?

Tanto durante e reunion y encuentro publico a keda subraya cu di berdad e situacion na RWZI ta critico pero cu pasonan a wordo tuma caba y lo sigui wordo tuma pa soluciona e problema akinan y asina salvaguardia nos medio ambiente.