Premier Evelyn Wever – Croes: A CERA ACUERDO PA REALISA PROYECTO EMBEYECIMENTO EAGLE BEACH CUAL TA HOPI AMPLIO Y TA ENCERA DIFERENTE PROYECTO
ORANJESTAD – Prome Minister Evelyn Wever – Croes a hiba palabra na e ocasion di acuerdo pa inicia cu Proyecto Embeyecimiento di Eagle Beach. Na e ocasion Prome Minister Wever – Croes a expresa cu aña pasa na ocasion di Revelacion di e Logo Nobo di TPEF a repasa e metanan di TPEF. Na e ocasion ey a bisa entre otro: “E producto cu Aruba ta ofrece ta resultado di un labor di amor; un sinergia constante y continuo di tur e actornan cu tin e producto Aruba na pecho”. Desde e momento ey te cu awe ya caba diferente proyecto a wordo realisa of ta den via di realisacion pa TPEF. Esaki ta e ultimo riba e lista cu ta hopi amplio di proyectonan cu tin cu wordo realisa ainda.
Ken no conoce nos precioso Eagle Beach. Di mucha hopi persona ta bin na e beach aki pa pasa un dia relahante cu famia, amigo y conocinan. Durante añanan cu a bin ta pasa a wak hopi cambio riba e strip aki. E cantidad di persona, tanto local como turista, a crece drasticamente. Edificio y hotelnan a wordo traha na otro banda di e boulevard y den e ultimo añanan a conoce e fenomeno di condominio. Tabata tin un temporada cu Eagle Beach tabata e Mecca di windsurfing. Ta corda tambe con e boulevard pariba di e beach cu tabata di dobel via tabata congestiona cu auto na ocasionnan special. Eagle Beach pa añanan largo tabata e luga ideal pa famianan campa den tempo di cuaresma. Contrario na e otro beachnan mas panort di Eagle Beach, e ta un beach cu ta bira hundo basta lihe. E otronan ta keda seco pa distancia largo for di costa mientras bo ta completamente safe. E fenomeno aki tabata conoci y tur hende tabata avisa bo cu si bo ta bay landa na Eagle Beach bo mester a haci esaki cu e cautela necesario. Eagle Beach a conoce un sin fin di actividad, tanto concierto como tur tipo di deporte. E actividadnan aki na dado momento tin nan influencia riba e calidad di e santo. Esey ta un hecho inevitabel. Ta pesey a hacie un prioridad pa drecha esey, y despues di e inversion den santo nobo, e beach a keda hopi bunita. Den revistanan internacional Eagle Beach pa hopi aña ya caba ta aparece den e top beachnan na mundo. Pa un isla chikito manera Aruba, cu tin hopi competencia riba e tereno aki, esey ta un reconocemento sumamente grandi di cual nos tur mester super orguyoso. A pesar di esey, awor a yega e momento pa di un forma structura, dedica atencion na e area aki.
Locual e proyecto ta encera
E proyecto di embeyecimento di Eagle Beach ta un inversion di TPEF como trekker. Na aña 2022 a pone 1 miyon florin disponibel y pa e aña 2023 lo pone un suma adicional di 500 mil florin. Lo inverti mas cu 200 mil den recipiente pa colecta sushi. E total inversion ta di 1.7 miyon florin di sector publico. ATA tambe ta contribui cu 385 mil florin. E proyecto ta encera embeyicimento di e area dunando e strip un bista uniforme cu mata y vegetacion, drecha banda di caminda y pone piedra blanco for di rotonde di Amsterdam Manor te cu rotonde di Alhambra. E recipientenan pa colecta sushi tin como meta contribui na maneha sushi di un forma mas eficiente. Haciendo e recipientenan aki visibel y accesibel bo ta incentiva e usuarionan di e Eagle Beach pa deposita nan sushi den esakinan, contribuyendo asina na tene e luga limpi.
E Proyecto di Embeyecimento di Eagle Beach ta un “private-public collaboration” na unda gobierno pa medio di TPEF y ATA ta inverti y propietarionan di e diferente edificionan na Eagle Beach ta percura pa e mantencionnan necesario. Trahando den union y contribuyendo asina cu e inversion cu gobierno ta haci ta keda den bon estado, elevando asina mas ainda e producto turistico Aruba.
Prome Minister Wever – Croes ta gradici colega Minister di Turismo Dangui Oduber, sra. Ronella Croes di ATA y sr. Mario Arends, presidente di TPEF, pa tur nan esfuerso y trabou duro cual ta refleha e amor cu tin pa Aruba.
