E DESGRACIA DI POLITICA CU E SITUACION DI RWZI

Riba dialuna 31 di januari 2022 nos tabata un biaha mas den Parlamento, den un Reunion Publico (‘OV’), den cual nos a trata e rapport di CARMABI y e situacion di RWZI. Despues di un tremendo mainta di informacion den un Encuentro Publico (‘OB’) riba diahuebs 27 di januari, den cual tur expertonan di DOW y DNM a duna un presentacion profesional di e situacion na RWZI y a contesta tur pregunta cu Parlamentarionan tabata tin. E expertonan a duna splicacion amplio di e situacion, e inversionan necesario pa mehora e situacionan temporalmente y cuanto nos ta bai tin mester pa plantanan nobo.

Di berdad e situacion na RWZI ta critico y Parlamento ta na altura di esaki y sigur tin nos atencion debido. DOW ya ta trahando y a inverti diferente suma grandi caba pa mehora e situacion na RWZI, cumprando ekiponan nobo pa optimalisa e funcionamento di e planta di Bubali. Esaki ta contrario locual politiconan di oposicion a bin ta vocifera y comunica cu pueblo, cu e proposito di crea caos y disgusto den pueblo cu nan mentiranan.

Lamentablemente Parlamentarionan Aquanette Gunn, Marisol Lopez-Tromp y Miguel Mansur no tabata kier a probecha di e oportunidad pa haci pregunta na e expertonan den e OB, y a expresa di kier hiba un debate politico y haci nan preguntanan na e ministernan so. Esaki ta exactamente loke a sucede na e OV dialuna 31 di januari, y mi mester bisa, cu despues di haci tur nan preguntanan, cual mayoria a wordo contesta caba diahuebs den OB, ta e mesun expertonan aki mester a duna e ministernan e contestanan. Tur esaki pasobra kier hunga politica.

Loke a bin sali afo durante e contestacion di minister Ursull Arends, na miembronan di Parlamento di AVP, tabata un evidencia y hecho di loke ma bin ta bisando caba di AVP. Nos por a mira cu den ultimo tempo AVP a papia tur sorto di cos sushi di RWZI den e medionan di prensa pa desacredita gobierno y expertonan. A bin resulta cu den nan plan di gobernacion cu nan a campaña cu ne den campaña di 2021, nan no tabata tin RWZI mes den dje! Nan no tabata tin niun plan pa trata cu e crisis di RWZI y sigur no a tuma decision algun pa trece cambio den e situacion actual cu rapport CARMABI ta menciona! Esaki sigur ta un hipocresia di marca mayor, sigur mirando cu pa dianan largo ta grita y ataca tur hende den gobierno.

E politica bieuw aki, cu ta pone e ambicion partidista y personal prome, ta destruyendo nos pais. AVP no tin Aruba na pecho y no ta pone nos pueblo prome. Nos por a wak tambe sra. Lopez Tromp ta zwaai cu papelnan, pero na final, rapport CARMABI a sali tempo e tabata minister. Y den e reunion publico aki awor e la bisa cu e no tabata sa di rapport CARMABI, e no a haya chens pa traha riba RWZI pa via di Covid. Anto e realidad ta cu sra. Lopez-Tromp no tabata tin un plan ni intencion pa haci nada y pesey no a haci nada.

Expertonan di DOW y DNM a bisa cu e ultimo cuater minister a wordo informa di rapport CARMABI, y esaki ta inclui sra. Marisol Lopez-Tromp, cu awor kier laba man un biaha mas. E gañamento sistematico di sra. Lopez Tromp a wordo exponi den pleno reunion y mucho mas e no por a bisa. Ta tristo di wak e tipo di politica sushi aki y cu ta keda refleha e politica bieuw di ambicion propio y no ta busca e mihor interes di pais Aruba.

Ta bon pa pueblo evalua y finalmente yega na e conclusion di e wega di politica sushi cu oposicion ta hungando y cu sigur falta di sinceridad den nan forma di procede. Adicionalmente, e stunt politico aki sigur a causa daño na nos turismo. Tabata tin comentarionan di turistanan riba e calumnianan di AVP riba RWZI, cual a sembra panico. AVP sigur no ta worry pa sigui crea y sembra panico y caos cu nan strategia di politica sushi, mal informando pueblo, y tratando di yega na poder ‘cueste lo que cueste’. Pueblo por ta sigur cu nan no lo stop, hasta si nan mester destrui nos economia. Nan a demostra esaki caba.

Afortunadamente a logra desenmascara nan ponencianan, nan mentiranan y nan intencionnan den parlamento. Awor corda semper cu nunca nan tabata tin RWZI den nan plan berde di gobernacion 2021. Nunca nan kier a soluciona e “ticking time-bomb aki.” Pesey, AVP sigur no tin Aruba na pecho. Su politiconan no ta stima Aruba, pasobra nan ta dispuesto pa tur cos pa gana bo voto.

Corectamente gobierno ta trahando duro den e ultimo añanan pa soluciona e problema aki y pueblo por ta trankil y sigur cu lo bin cambio den RWZI. Nos beachnan y nos lama ta safe pa landamento y pa disfruta. Muestranan di DVG ta wordo tuma regularmente pa garantisa e bienestar y salud di nos dushi pueblo di Aruba. Loke Aruba mester awor ta solucionnan concreto y accion rapido pa asina garantisa Aruba su futuro.

Adicionalmente, como parlamentario, mi a presenta un mocion, pa urgi gobierno di Aruba pa banda di inversionan haci caba y esunan presupuesta: pa bin cu un meerjarenplan structural di mantencion pa tur tres planta di RWZI, specialmente esun na Bubali Plas. Tambe pa aloca fondonan necesario den begroting pa asina por realisa e inversionan necesario pa mantene structuralmente tur tres planta di RWZI. Asina mi kier contribui cu e maneho di e plantanan aki y sigura cu ora a renoba y cumpra instalacionan nobo, nos no lo pasa den un crisis asina mas.