Minister Dangui Oduber: E MANEHO DI DIVERSIFICACION DI NOS TURISMO TA CONTINUA. E AEROLINEA AVIANCA AWOR CU VUELO DIRECTO PA MEDELLIN

ORANJESTAD – Den cuadro di diversificacion Minister di Turismo y Salud Publico sr. Dangui Oduber ta comparti cu e aerolinea di Avianca ta aumenta nan vuelonan pa Aruba. Avianca lo ta operando 4 vuelo semanal for di Medellin Colombia pa un temporada, di 13 di juni pa 20 di augustes di e aña aki. E vuelonan existente for di Bogota cu ta vuelonan diario lo continua normal.

E vuelo for di Medellin lo ta 4 biaha pa siman riba diamars, diahuebs diasabra y diadomingo, Avianca ya ta operando 14 vuelo semanal tur dia di siman. Durante e temporada di zomer Avianca lo tin total di 18  vuelo semanal pa Aruba cu nan ta opera cu nan avion Airbus A320 cu tin un capasidad di 186 asiento.

Minister Dangui Oduber ta satisfecho con Aruba su turismo a bay den aña 2022, caminda a registra un grado di recuperacion di nos turismo di 98.4% den comparacion cu aña 2019. Tur indicacion ta mustra cu aña 2023 nos lo surpasa cifranan di aña 2019. E aumento di vuelo di Avianca ta bay haci cu lo bay tin un aumento den e “airlift” di Latino America pa Aruba den e temporada di zomer.

Diversificacion di nos turismo ta keda parti di e strategia y cu e vuelo adicional aki minister Oduber ta cumpliendo cu esaki.

Minister Dangui Oduber a duna di conoce cu diversificacion di rutanan den latino America ta cuadra cu e maneho di Gobierno. Minister Oduber ta hopi satisfecho cu e trabou cu e airlift committee ta haciendo. Ban sigui traha hunto pa nos sigui engrandese nos turismo.