Parlamentario Marco Berlis (MEP): AVP TRATANDO DI DESVIA ATENCION FOR DI CASO IBIS Y AVESTRUZ CU LO TIN VEREDICTONAN PROXIMAMENTE

Diamars mi por a constata con AVP den su desesperacion comun kier sigui gaña pueblo. Hungando politica y tratando di manipula pueblo, nan kier pa pueblo pensa cu nan ta esun cu ta entregando keho oficial contra di Besaril. Nan “gañamento comun” ta pa trata na score cu otro hazaña di comedia politico y asina entretene pueblo. E realidad ta completamente opuesto cu loke nan ta trata na bende pueblo. Ora cu un carta oficial a wordo presenta cu e kehonan di Arubahuis, Minister President a manda CAD y DRH bay investiga y traha un rapport di e investigacion. Esaki tabata tin su proceso. E prueba di esaki ta e informacion constante cu a wordo duna den ruedanan di prensa riba e tema di Arubahuis cu Minister President a duna y tambe con e la comparti informacion cu Parlamento na varios ocasion. E la comparti cifranan y hechonan di e investigacion aki cu Parlamento. Ademas di esaki, Minister President Evelyn Wever-Croes a subraya cu a entrega tur rapport y evidencia na Ministerio Publico pa asina nan por tuma pasonan firme pa presenta nan caso. Mas transparente cu esaki e no por bay. Esaki a wordo haci di e forma aki pasobra e filosofia y principio di nos partido Movimento Electoral di Pueblo MEP ta, cu cada un cu comete un delito mester sinta riba su mesun blaar. Hamas por hustifica niun sorto di abuso di propiedad y placa di pueblo!

AVP den su desesperacion y farsa comun awor kier sali y pinta un storia cu tur cos a bay di un forma diferente. “Really?” Net AVP, cu a brasa corupcion den tur sorto di forma! Caso IBIS a wordo tapa y hasta a firma un ley pa un ex-minister por a sigui cobra su salario. A tapa e corupcion den caso Avestruz, e caso di corupcion, fraude y friends and family mas grandi den historia di Aruba. Dicon AVP ta desespera? Pasobra e veredicto final di cassatie di caso IBIS ta 7 februari proximo y e abogado general di cassatie na Hulanda a publica nan conseho; e veredictonan di prome instancia y HOF mester keda honra y cu no tin ningun argumento valido pa cambia esakinan! Esaki kiermeen cu AVP ta para dilanti un abismo politico profundo y menasante! Ademas, caso Avestruz tambe lo conoce veredicto entre anuari y februari 2023. AVP su filosofia di e “bon comun” ta ricibiendo sla frontal continuo y lo conoce un “morto incomun.”

AVP ta tratando pa maniobra memey di nan sopi di corupcion, sinembargo no lo por evita e consecuencianan di loke nan a apoya, tapa, brasa y promove corupcion y fraude comun! Esaki ta unda cu MEP ta diferencia cu AVP: transparencia den e proceso di investigacion y na final entrega tur prueba di e investigacion na OM. E transparencia aki a haci AVP dolor, pasobra nan sa cu nan filosofia ta pa “tapa nan corupcion comun.” Pa loke ta Dowers cu a kita radarnan laga Aruba su fronteranan habri pa arma, droga y illegalnan drenta y Mike de Meza cu nunca a haci algo pa San Nicolaas y tabata e minister di finansas cu a hoga Aruba; sigui haci boso show comun, pasobra e berdad lo sali na cla pronto. AVP nunca mas!

Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!