MINISTERNAN DI ENSEÑANSA DI ARUBA, CURAÇAO, HULANDA Y SINT MAARTEN TA DESEA DI INTRODUCI UN BECA PA FOMENTA INTERCAMBIO DI STUDIANTE DENTRO DI REINO HULANDES.
ORANJESTAD: Recientemente, Minister Endy Croes a atende “Vierlandenoverleg” na Curaçao hunto cu Ministernan di Enseñansa di Reino Hulandes, esta Minister di Enseñansa di Curaçao, sr. Sithree van Heydoorn, Minister di Enseñansa di Sint Maarten, sr. Rodolphe Samuel y Minister di Enseñansa di Hulanda, sr. Robbert Dijkgraaf. Durante e reunion anual di Enseñansa, Cultura y Ciencia entre e 4 paisnan di Reino Hulandes, e Ministernan di Enseñansa a presenta e proyecto Beca di Reino (Koninkrijksbeurs).
“Ta importante pa nos ofrece e hobennan di e islanan un miho perspectiva door di uza e poder di reino”, Minister di Enseñansa di Hulanda Sr. Robbert Dijkgraaf a expresa.
Segun varios investigacion, ta indica cu e studiantenan di Caribe cu ta sigui studia na Hulanda ta enfrenta diferente reto y/of barera. E 4 paisnan, esta Aruba, Curaçao, Sint Maarten y Hulanda, kier introduci “Caribbean Academic Orientation Year”, pa prepara e studiantenan miho pa estudio di Enseñansa Superior (HBO) y/of universidad.
E plan ta pa e 3 universidadnan den e parti Caribense di Reino Hulandes ofrece conhuntamente un programa pa e aña di orientacion, unda cu tin e opcion tambe di traha den colaboracion cu Enseñansa Superior y universidadnan di Hulanda.
E intencion di esaki ta pa den futuro Enseñansa Secundario den e parti Caribense di Reino Hulandes ta mas alinia cu Enseñansa Superior y universidadnan di Hulanda.
