Parlamentario Alvin Molina (MEP): HBK San Nicolas cla pa sigui brinda servicio.

Despues di un temporada un poco fastioso pa clientenan di Hulp Bestuurskantoor (HBK) San Nicolas, a logra habri’e bek pa brinda servicio na comunidad pariba di brug. HBK a habri den un localidad temporal di Refineria di Aruba (RdA). Ta comprendibel cu na luna di oktober 2022 a cera e edificio bieu, pa motibo cu unda e tabata ubica, no tabata adecua mas. No tabata saludabel pa esnan cu ta traha eynan, y tampoco p’e clientenan door cu tabatin schimmel. Di otro banda si e doño di e edificio a percura pa mantencion, kisas e situacion no mester a yega asina leu. San Nicolas mester a haya su mes un MFA algun aña atras caba. Un di e prome distritonan cu mester a haya MFA, pero lamentablemente San Nicolas a keda afo. E plan cu a wordo presenta ta cu e edificio unda HBK tabata situa, ta wordo remodela, pa ubica mas departamento aden e.o.,  Sociale Zaken, Dimas, AZV y Enseñansa pa Empleo. Sigur mi ta gradici nos Minister President Evelyn Wever-Croes y directora di Censo, Sharline Luidens y su ekipo pa den un temporada relativamente corto, e servicio por a wordo brinda bek na pueblo di San Nicolas y bisindario. Manera boso por wak, mi tambe a logra haya mi papel di 5 florin. Nos ta keda pendiente pa e desaroyonan pa cu MFA San Nicolas.