SAN NICOLAS y ORANJESTAD PUNTO DI ENFOKE DI BISHITA REAL

ORANJESTAD – Su Mahestad Rey, y Su Mahestad Reina Máxima y Su Altesa Real
Prinses van Oranje ta di bishita na Aruba dia 30 y 31 di januari venidero. Durante e dos
dianan aki e citionan San Nicolas y Oranjestad lo ta punto di enfoke.
Programa San Nicolas
Dialuna 30 di januari, e delegacion Real hunto cu Gobernador di Aruba, Su Excelencia señor
Alfonso Boekhoudt y secretario di estado, Señora Alexandra van Huffelen lo bishita e districto di
San Nicolas pa sumergi den e cultura di San Nicolas.
Tributo Boy Ecury
Den oranan tempran di atardi, e scolnan di San Nicolas lo tin e oportunidad pa yama e
delegacion Real bon bini ora cu nan yega pa 3.25 pm. Na Filomena College Basisschool y
Filomena College Mavo lo tuma lugar e Obra Teatral ‘Op Zoek naar Boy’ cu ta un cooperacion
di Colegio San Antonio, Filomena College, Muchila Creativo, Sticting Monumentenfonds Aruba,
MBO Media College Amsterdam y Stichting Cultuurgeneratie. Hunto cu esaki lo pone atencion
na e mural di Boy Ecury cu ta un tributo na e hoben heroe cu a fayece 6 november 1944.
Bishita na Museum of Industry
Despues e delegacion Real lo cana riba e plenchi di Misa Santa Teresita. Aki nan lo wordo
compaña door di muchanan di scol basico y artistanan bou di guia di Sr. John Freddy Montoya
y Sra. Lupita Bernabela den dirrecion di Museum of Industry. Na Museum of Industry,
Fundacion di Museo Arubano lo ofrece un splicacion na e delegacion Real di e diferente
desaroyonan economico cu Aruba a experiencia, manera esaki ta desplega den e museo.
Centro di San Nicolas
For di 4.15 pm, e Famia Real lo ta canando den centro di San Nicolas pa admira e diferente
mural cu ta dorna e edificionan di e centro di ciudad. Lo termina e recorido den centro di San
Nicolas na Nicolaas Store pa 4.45 p.m. cu un show bou di encargo di Sr. Freddy Tromp pa
mustra e talento hubenil di Aruba.
Programa cultural na Oranjestad:
Dia 31 di januari e delegacion Real lo sigui experiencia e rikesa y diversidad cultural di nos pais.
Esaki iniciando na feria cultural na Plaza Padu y despues pa Bon Bini Festival na Fort Zoutman.
Plaza Padu
E delegacion lo yega pa 7:00 p.m. na plaza Padu na unda nan lo wordo saluda pa un grupo di
mucha aliña pa yama e delegacion Real bon bini. Despues ta sigui pa un mercado cu diferente
artesano na Aruba. Asina nan por cera conoci cu artesanonan cu ta traha diferente producto
autentico manera hoya, rom, producto pa cas, bela, cos dushi y tas unico. Despues di a bishita
e mercado riba Plaza Padu e delegacion Real lo experiencia un produccion spectacular. Ta
trata di un show di baile y musica duna pa artistanan conoci. Ta trata artistanan Chris Kross,
Johnny Schaarbaai, Christopher Rudolfo, Denny Loefstop, Edjean Semeleer, Susjaira Kerpens
y bailarina Liselotte van Doorn. Despues ta sigui cu presentacion di baile festivo di Club di
Movimiento bou guia di Samantha Westera-Juppa cu lo guia e delegacion Real pa e
festividadnan na Bon Bini Festival. Publico lo tin e oportunidad di por sigui e festival di Bon Bini
tambe riba Plaza Padu por medio di pantaya cu lo ta disponibel transmitiendo esaki.
Bon Bini Festival:
E festividadnan ta sigui pa 7.20 p.m. cu e tremendo Bon Bini Festival na unda lo duna un
presentacion extenso di Aruba su historia y folklore. Finalmente lo clausura e anochi cu un
parada carnavalesco acompaña pa grupo di brass band cu lo guia e delegacion Real na nan
salida.
Invitacion special
E Comision Bishita Real ta invita e comunidad completo pa presencia e festividadnan na San
Nicolas y Oranjestad y pa forma parti di e celebracion Real aki. Bin celebra nos isla y nos
diversidad dia 30 y 31 di januari!