Prome Minister Evelyn Wever – Croes: PARLAMENTO A APROBA PRESUPUESTO 2023 DI DOW

E aña aki por cuminsa inverti bek den Aruba su infrastructura

ORANJESTAD – Siman pasa Prome Minister Evelyn Wever – Croes tabata den Parlamento di Aruba pa trata presupuesto di DOW pa aña 2023. Premier Wever – Croes ta gradici e fraccionnan di coalicion y tambe fracionnan di MAS y Accion 21 pa a sostene e presupuesto aki cual a wordo aproba. Awor gobierno por inverti bek den infrastructura y careteranan.

Ya pa dos aña caba gobierno no por inverti den careteranan pa motibo cu despues cu e pandemia a bati na nos porta, mester a pone e prioridad riba scapa bida di hende y pone cuminda riba mesa di esnan cu tabatin mester di ayudo. Pues tur e placa cu tabatin pa infrastructura a wordo hala pa atende cu e pandemia. Consecuentemente, como cu pa dos aña largo no a inverti den infrastructura, por tuma nota aworaki cu careteranan a bay atras. Tin hopi caminda cu tin mester di atencion urgente, tin buraco diferente caminda, otro caretranan mester mantencion y tin careteranan nobo cu no por a wordo traha. Ademas, cu tur e awasero cu a cay ultimamente, e situacion a bira mas grave.

Prome Minister Wever – Croes a splica cu aworaki cu tin un surplus den e presupuesto, a logra aloca fondo pa traha riba proyectonan di infrastructura. Tin 1.6 miyon florin pa careteranan nobo y tambe fondo di mantencion di careteranan. Considerando cu tin hopi area cu tin necesidad pa wordo drecha rond Aruba y cantidad di fondo limita, DOW ta trahando riba un Masterplan cu ta encera e necesidadnan pa Aruba su infrastructura pa e siguiente 10 añanan. Unabes e Masterplan ta cla, lo busca financiamento pa ful e plan y pa asina logra mehora Aruba su infrastructura.

Concluyendo, Premier Wever – Croes a bisa, cu e aprobacion di Parlamento ta e prome paso pa cuminsa traha pa mehora Aruba su infrastructura y e careteranan di Aruba, pesey ta gradici Parlamento pa a aproba e presupuesto aki.