Minister Dangui Oduber: TRABAONAN DI PROYECTO BABY BEACH TA AVANSANDO

ORANJESTAD – Tur esnan cu a bishita nos playanan den Seroe Colorado por a tuma nota di e cambio nan na caminda. Minister di Turismo y Salud Publico sr. Dangui Oduber ta comparti cu e trabaonan di proyecto di Baby Beach ta avansando. Tur esaki ta parti di henter MasterPlan cu tin pa e area di Seroe Colorado.
E proyecto aki ta bay eleva henter e area rond di e playanan aki teniendo na cuenta e importancia di conserva nos naturalesa, creando asina un desaroyo di embeyesimento di e area na un manera sostenibel.
Den e ilustracionnan por mira e avansenan di Fase 2 di e proyecto di Baby Beach cu ta den pleno ehecucion. Den e fase aki entre otro ta construiendo un area di parkeo completamente nobo, iluminacion nobo y un retonde nobo, cual tambe ta parti di e plan aki. Ta bay tin bañonan publico pa tur bishitante, lo pone tambe dos kiosko caminda hende por bay cumpra cuminda y/of bebida. E meta ta pa e kiosko nan aki refleha e cultura Arubano y bende cuminda nan cu ta tipico den e area di Caribe.
Pronto y dentro di e prome cuartal di aña 2023 gobierno lo cuminsa cu e destaho publico pa asina cuminsa cu Fase 3 di e proyecto. Den e fase aki lo renoba e 2 tennis court, tambe lo traha riba un court multifunctional cu por wordo uza pa beach tennis, beach volley y beach soccer. E gazebo mei mei di e tennis courtnan lo bira un restaurant y lo renoba e trapi banda di esaki tambe uzando arte di mosaic. Tambe ta bay hala e turtle wall mas atras, yena e area cu santo blanco pa asina haci e beach mas grandi.
Turismo ta e driver di nos economia y pesei su desaroyo ta keda un prioridad. Pronto San Nicolas tambe ta bay haya su fair share den e desaroyo di nos pais ora e bunita proyecto aki finalisa.
Minister Oduber ta sigui percura pa proyectonan wordo ehecuta cu lo duna un balor agrega na producto Aruba.