mr. dr. Ryçond Santos do Nascimento (AVP): MEP-RAIZ kier e poder pa silencia Ombudsman

AVP ta completamente pro Ombudsman. Un Ombudsman ta pa yuda ciudadano cu ta haya su mes den problema cu gobierno. Su tarea ta pa yuda hisa e nivel di gobierno su servicionan na ciudadano door di investiga si gobierno ta comporta su mes di un manera husto, cu respet y fair (fatsoen). Si e Ombudsman ta gosa di respet y autoridad den comunidad, su consehonan por tin un impacto grandi riba opinion publico.

E instituto Ombudsman ta merece un luga di prestigio den nos sistema gubernamental. P’esey ta bon pa dun’e un luga den nos Constitucion. Pero, bao Gabinete Wever-Croes II no tabatin ningun reunion parlamentario riba e contenido di e propuesta di cambio di Constitucion ni riba e amiendanan. A pesar cu no tabatin debate entre parlamentarionan despues di ultimo eleccion, a yama un reunion publico pa dia 10 di maart 2022. Tanto fraccion di MEP como fraccion di RAIZ a expresa cu nan no kier a delibera y nan kier a pasa directamente pa votacion. Asina tanto MEP como RAIZ a sabota e cambio di Constitucion. Nan a nenga – a proposito – oportunidad pa delibera.

MEP un biaha mas a demonstra con mentiroso e partido ta, ora MEP a cuminsa difundi cu oposicion ta contra Ombudsman. Esaki ta un mentira, pasobra ta hustamente oposicion kier mira investigacion riba tur abuso di gobierno contra ciudadano. E argumento cu MEP ta purba bende ta cu e partidonan AVP, MAS y Accion21 a perhudica 110 mil ciudadano door di abstene nan di nan derecho di haya un trato husto y corecto for di e instituto ‘Defensor di pueblo’.’ Di e manera aki MEP mes ta yama Gabinete Wever-Croes inhusto y cu ciudadano mester di un Defensor di Pueblo contra e gobierno aki di MEP-RAIZ. En todo caso e argumento cu MEP ta uza ta falso pa motibo cu desde 24 di september 2020 nos tin un Landsverordening Ombudsman caba. E unico cos cu tabata falta pa nos tin un Ombudsman, ta pa activa e ley aki pa medio di un Landsbesluit (articulo 42 inciso 1 di e ley di Ombudsman). Si te awe no tabatin Ombudsman ainda, esaki ta completamente pa motibo cu gobierno no a traha un Landsbesluit.

RAIZ sa cu su credibilidad ta na suela pa motibo di a sostene nepotismo y falta di transparencia den entre otro e caso di LNG. P’esey RAIZ a dicidi pa enfoca riba e exigencia di aprobacion di dos tercera parti di Parlamento pa kita Ombudsman. Segun RAIZ no ta acceptabel pa exigi aprobacion di dos tercera parti, pasobra un minoria den Parlamento lo por impedi pa motibonan politico cu ta distitui un Ombudsman cu ta disfuncciona. RAIZ no kier bisa cu solaamente un Ombudsman cu ta “untouchable” pa e parlamentarionan di MEP y RAIZ por haci su trabao di un manera independiente sin miedo pa wordo kita for di trabao. E funcion di e aprobacion di dos tercera parti di Parlamento pa kita Ombudsman ta hustamente pa garantiza e independencia di e Ombudsman. Esaki ta comparabel na e independencia di un hues cu ta ser nombra pa bida, sin cu gobierno ni parlamento por mand’e cas. Hecho ta cu MEP tin un historia di persecucion politico y parlamentarionan di coalicion ta sostene e deseonan di Gabinete Wever-Croes ciegamente. E realidad ta cu MEP sa pone ley y Constitucion un banda pa impone un boluntad politico di forma ilegal y dictatorial. Djis corda con fraccion di MEP kier a elimina minister Marisol Lopez-Tromp: Presidente di Parlamento, Ady Thijsen, a sigui cu un reunion publico y cu votacion pa cu un mocion di desconfiansa sin cu tabatin e quorum cu ley ta prescribi. Ta Gobernador mester a interveni pa hala e decision aki bek aden. En bes di siña for di e les aki, awe kier mantene e poder politico na banda di gobierno pa por kita un Ombudsman cu ta critico y cu ta haci su trabao.