PROME MINISTER TA BISHITA SCOL PRIMARIO KUDAWECHA NA NOORD

Siguiendo su bishitanan na scolnan den e siman di celebracion di Dia di Betico

Faltando dos dia pa e celebracion di e fecha natal di e gran politico, lider, estadista y Libertador Arubiano, señor Gilberto François ‘Betico’ Croes, dialuna mainta, Prome Minister Evelyn Wever-Croes a sigui cu su bishitanan na varios school rond di nos isla. Na Scol Primario Kudawecha e Premier di Aruba a wordo ricibi pa Cabesante Xiomara Berkel, maestronan y alumnonan hopi entusiasma y contento cu e bishita di e mandatario. Prome Minister cu un curason alegre a saluda e muchanan pa despues sigui pa klasnan 5.

Muchanan di Klas 5A di Meneer Dwayne Albus, a prepara un bunita presentacion di poesïa expresando un frase di Aruba den diferente idioma y esaki ta loke ta haci e presentacion mas special. Alumnonan di Klas 5B di Juffrouw Lise Heeneman, a dirigi hopi pregunta na Prome Minister kende a contesta cada pregunta. Despues e alumnonan a demostra nan talento y a toca un ritmo uniforme y hopi bunita batiendo cu nan man riba banki.

“E ta hopi emocionante pa mira con tur mucha ta wordo prepara pa un dia importante asina y mi ta spera cu Betico su lucha y su bida ta inspira nan tambe pa nan ta e miho version di nan mes den scol, den deporte, den nan hobbynan y den tur loke nan ta haci pasobra esey ta loke Betico lo tabata kier pa nos cada un”, Prome Minister a expresa.

Prome Minister ta gradici Scol Primario Kudawecha, Cabesant, demas maestro y alumnonan di e scol basico pa e atencion amabel y cordial brinda na su persona durante su bishita dialuna mainta 23 di januari.