Retonan Parkietenbos
Ministerio Publico conoce e retonan grandi relaciona cu dump y pikimento di sushi, pues cu medio-ambiente y naturaleza aki na Aruba. Particularmente pa habitantenan di Parkietenbos y vecindario.
Na 2021 Ministerio Publico a ricibi denuncianan tocante e molester di dump y e incinerator, cu a drenta na uso e aña ey. Ministerio Publico ta conclui en conexion cu esaki cu legislacion riba tereno di naturaleza y medio-ambiente na Aruba ta cana tras: e Hindervergunning ta data di 1988, tin apenas leynan y reglanan y no tin hindervergunning pa e dump na Parkietenbos. E ultimo aki ta hiba na un hecho castigable. Ministerio Publico tabatin contacto recientemente tocante esaki cu minister di Naturaleza. Pa e incinerator si a duna un hindervergunning.
Riba 2 di februari Procurador-General di Aruba a papia cu señora mr. Anouk Balentina relaciona cu su denuncianan. A informa señora Balentina cu pa awor Ministerio Publico lo no duna boet pa e hecho cu a sigui laga e dump funciona sin un hindervergunning.
Tin varios razon pa e decision aki. Un di nan ta cu e dump ta den funcion pa mas cu 60 aña caba y desde 1988 sin hindervergunning, es decir 34 aña largo. Ta Ministerio Publico su tarea pa investiga y persigui hechonan castigable, pero e punto di salida ta semper cu e uso di ley penal ta e ultimum remedium. E ta algo cu ta wordo usa ora a purba tur e otro posibilidadnan. Na huicio di Ministerio Publico esey no a pasa. E Hinderverordening di 1988 ta duna posibilidadnan si pa limita e molester door di gobierno. Ademas dunamento di un boet lo no soluciona e problema di dump y di e habitantenan di Parkietenbos. Pa soluciona esey mester di otro tipo di solucion y di solucion fundamental.
Pa loke ta trata e planes di gobierno riba e tereno aki Ministerio Publico ta constata cu e minister di Naturaleza a indica varios biaha publicamente cu e lo kier tuma pasonan concreto pa loke ta dump, pikimento di sushi y medio-ambiente y naturaleza di Aruba, y cu e minister ta reuni cu parlamento, varios stakeholder y habitantenan, pero cu esaki lo ta un proceso largo. Los di e planesnan aki Ministerio Publico ta di opinion cu mester bin claridad rapidamente tocante un hindervergunning pa e dump, aunke Ministerio Publico ta compronde cu lo costa tempo. Na fin di 2022 Ministerio Publico lo considera di nobo e decision pa cu e denuncianan.