BISHITA DI FAMIA REAL A CULMINA CU UN BUNITA ANOCHI CULTURAL RIBA PLAZA PADU

ORANJESTAD – Diamars 31 di januari tabata e di dos dia cu Rey Willem-Alexander, Reina Maxima y Prinses Amalia tabata na Aruba. Un dia cu a inicia cu caminta trempan den Parke Nacional Arikok y cu a culmina den un bunita celebracion cultural riba Plaza Padu special dedica na e Famia Real.

E prome sitio cu e Famia Real a bishita riba nan di dos dia na Aruba tabata Parke Nacional Arikok. Akinan e Famia Real a cana den naturalesa acompaña pa esnan cu ta traha den e parke. Nan a siña untiki di Aruba su flora y fauna, especialmente di especienan protegi y nan a comparti un rato agradabel cu e park rangers.

Prinses Amalia cu ta prome biaha di bishita na Aruba a bishita Aruba Aloe hunto cu su mayornan. Na e sitio e famia a conoce e fabrica di Aloe y tur e productonan di cuido cu Aruba Aloe ta crea. Na e ocasion e Famia Real a combersa cu empleadonan y nan a traha nan mesun producto.

Despues di merdia Universidad di Aruba a organisa un lectura y un quiz special cu studiantenan di e facultad di derecho tocante “Caribisch Recht”. Na e ocasion Rey Willem-Alexander, Reina Maxima y Prinses Amalia cu tambe a wordo invita pa forma parti di e lectura y e quiz, a tuma tempo pa comparti cu e studiantenan y docentenan di universidad tocante educacion na Aruba, oportunidadnan laboral y sostenibilidad.

Mientras cu Reina Maxima a bay bishita un proyecto di agricultura di Qredits (Cunucu famia Koolman),  Rey Willem-Alexander y Prinses Amalia a bay Compleho deportivo Frans Figaroa pa un demostracion di futbol di un grupo di mucha muhe y mucha homber talentoso.

Bishita di Famia Real ta conclui cu un bunita anochi cultural riba Plaza Padu y Bon Bini Festival na Fort Zoutman. Akinan Rey Willem-Alexander, Reina Maxima y Prinses Amalia a cera conoci cu productonan local y nan a disfruta di diferente presentacion di canto y baile. Tabata un bunita anochi yena cu ambiente den compania di adultonan y muchanan cu tabata presente pa saluda y comparti un rato agradabel den presencia di Famia Real.