Prome Minister Evelyn Wever-Croes: PROME MINISTER A REUNI CU E ORGANISACION UNHCR DI NACIONNAN UNI

Hunto cu Minister Glenbert Croes y ‘ketenmanager’ Gina Lopez-Gnecco

A yega na palabracionnan concreto con pa sigui cu e relacion den futuro

Siman pasa, hunto cu Minister Glenbert Croes y ‘ketenmanager’ Gina Lopez-Gnecco, Prome Minister Evelyn Wever-Croes a reuni cu e organisacion UNHCR di Nacionnan Uni. E organisacion aki na Aruba ta encarga su mes cu refugiadonan/ imigrantenan cu ta bin di Venezuela y cu mester di ayudo. Gobierno di Aruba desde 2018 tin un bon relacion cu e entidad aki cu ta yuda y asisti riba e area di refugiadonan y cantidad grandi di imigrantenan Venezolano.

E agencia aki di Nacionnan Uni a yuda pa revisa proceduranan pa asina e proceduranan aki na Aruba ta mas efectivo y teniendo cuenta cu tur e aspectonan di refugiadonan. Tambe nan a haci un investigacion riba mercado laboral di Aruba y di Corsou hunto cu e agencia di Nacionnan Uni, International Labor Organization (ILO), pa tin un bista con e situacion ta riba mercado laboral pa asina tin miho idea tambe con e refugiadonan eventualmente lo por yuda den esaki.

“Aruba ta atende cu e retonan riba tereno di asilo na un forma sublime. Pa esaki nos ta gradici tur esnan cu ta labora den e departamento di asilo. Aruba ta parti di e tratado internacional di refugiadonan di Nacionnan Uni. Den cuadro di esaki mester aplica e proceduranan di asilo. UNCR ta yuda Aruba tambe no solamente den e proceduranan sino tambe ta asisiti e refugiadonan den tur locual cu nan tin mester”, Prome Minister a duna di conoce.

Prome Minister a expresa cu e reunion tawata hopi bon y informativo den cual a yega na palabracionnan concreto con pa sigui cu e relacion den futuro y reiterando e bon relacion cu Aruba tin cu e organisacion UNHCR di Nacionnan Uni desde aña 2018.