Parlamentario Arthur Dowers: Prome Minister ta acepta di no a haci algo pa Santa Cruz

A  bira tempo pa Prome Minister Evelyn Wever Croes busca un otro ‘hobby’ pa haci ya cu gañamento di pueblo a bira un tradicion diario te cu ta mustra cu e lider di MEP mes no ta realisa con of riba kico e tin cu gaña pueblo.

Parlamentario Arthur Dowers di fraccion di AVP a mustra cu masha curashi Evelyn ta bin dilanti y pa hustifica cu a pone DOW basha un capa di asfalt nobo dilanti di sede di MEP na Santa Cruz, awor e ta bin pretende cu e bario ta esun cu mas a ser neglisha den loke ta ponemento di asfalt.

“E momento a yega pa Evelyn busca un otro estilo pa gaña pueblo ya cu su mentiranan ta asina bisto cu tin ora prome cu e bisa algo, ya tur hende sa cu e ta gañando atrobe.

For di 2017, Evelyn ta Prome Minister di pais Aruba, pues e ta den su di seis aña gobernando e pais aki y ora cu e bisa cu e bario di Santa Cruz ta e bario mas neglisha den asunto di caminda di asfalt, e ta lubida por completo cu esey ta nifica cu e gobierno di su MEP, tin seis aña sin saca un dede pa yuda e bario aki.

Y aki ta bon pa menciona cu pa un arte de magia, Evelyn ta lubida cuanto placa a wordo gasta pa asfalta caminda durante di campaña electoral di 2021, caminda a asfalta caminda su famianan y sostenedonan tabata biba.

E señora aki ta asina bruha cu e no ta realisa cu ora cu e bisa cu Santa Cruz a wordo neglisha, e ta acusando su propio gobierno, pa colmo e ta pone duda den su propio capacidad como Minister di Infrastructura y DOW, ministerio cu el a tuma over despues cu el a pidi gobernador retira Marisol  como minister.

Ta bisto cu e situacion di gañamento di Evelyn a bira asina serio  cu e no ta ria di haci esaki cu su propio hendenan di MEP, votadonan di MEP faltando nan respet dor di kere cu e por manipula e berdad cu su votadonan.

Gobierno di AVP den su plan di bario tambe a duna Santa Cruz atencion pero ta realmente un berguensa cu e lider di MEP den dos periodo di gobernacion, a haci net nada pa e bario aki,” Parlamentario Arthur Dowers a declara.

Desde cu a tene e reunion riba presupuesto di DOW unda cu lo drecha cierto caminda, un di nan ta Santa Cruz dilanti Sede di MEP, a bin discusion riba esaki pero tambe hopi critica. Con ta scoge cua caminda ta prioridad pa drecha, ta den encargo di DOW. Pa hopi aña e bario di Santa Cruz tabata neglisha pa haya asfalt.

mr. Evelyn Wever-Croes, Prome Minister di Aruba, a splica cu nan ta habri y semper ta scucha tur eseynan. Den parlamento tabatin cierto critica, pero a informa nan cu lista ricibi a bin fo’i DOW. DOW ta esun cu ta indica riba su prioridadnan. DOW a splica riba cierto caminda, por ehempel e caminda di Kibaima pa Tanki Flip ta uno hopi importante y cu ta drecha.

Segun e mandatario, ciudadano di San Fuego tin rason riba nan reclamo, pasobra Santa Cruz ta mas neglisha den e ultimo añanan. Durante e prome ocho aña dje gobierno prome cu Gabinete Wever-Croes, no a haya atencion. El a sigui indica cu na momento nan a drenta gobierno a haya masha poco nan tabatin e chens pa haci algo. E cartera tabata bou encargo di ex-minister Otmar Oduber, pero despues a bin pandemia y nan mester a stop.

Awo den e prioridadnan cu DOW a pone, ta bay mira unda mester di mas atencion.