Minister Xiomara Maduro: Presentacion video di discurso y expresionnan historico di Betico Croes a duna un toke masha special durante e Manifestacion Cultural

Durante e Manifestacion Cultural riba Plaza G.F. Betico Croes dia 24 di januari ultimo, un dia prome cu Dia di Betico, a ser presenta un video cu ta contene un compilacion di varios discurso y expresionnan historico di Betico Croes. Pa e publico presente y esnan cu a sigui e manifestacion na television of plataforma social, esaki tabata un momento hopi emocional cu a toca e curason di hopi. E voz firme di Betico conmovedor a resona, y un y tur por a re-biba e lucha hiba pa nos Libertador.  Betico tabata conoci pa usa hopi expresion den su discursonan durante reunionnan importante cu tabata capta hopi atencion.

Riba e anochi aki algun di e expresionnan historico cu a keda rezona tabata, “Si mi cay na caminda, hamas boso laga e causa un banda pero gara e bandera Arubano y sigui cu e lucha pa conserva y preserva e Libertad di e pueblo aki”. Cu e expresion aki Betico a motiva nos pueblo pa sigui cu e lucha pa conserva y preserva e libertad di e pueblo aki, y pa nos sigui traha na  bienestar di nos pais Aruba.

Otro expresion historico presenta ta, “Mi no ta un tata di un famia cu ta consisti di homber y muher y yiunan”. Betico aki ta expresa cu e ta un tata particular, un tata di un famia grandi, un tata di nos pueblo di Aruba. Di e manera aki Betico a mustra e amor y stimacion pa nos Pais, na unda ela sacrifica su hogar contal cu e logra su meta, esta, e Libertad di su pueblo. 

“E pueblo aki bo no ta cumpr’e ni bend’e cu placa,” ta otro expresion uza pa Betico unda e ta expresa su sentimento di orguyo di ta yiu di e pueblo aki. Ela corda nos cu e pueblo aki bo no ta cumpre, ni bende pa placa.

E video cu e expresionnan di Betico a duna un toke masha special na e Manifestacion Cultural, brindando honor na nos Libertador y inspirando e amor patrio den e mente y curason di nos pueblo cu por sinti su mes masha orguyoso di ta yiu di e tera aki.

Minister Maduro ta gradici Comision Celebracion Dianan Nacional y sr. Norman Thijsen pa a produci e bunita video aki.