Tanique Chan nos super modelo lo ta riba pasarela na New York Fashion Week 2023 

Diahuebs ultimo a biaha pa New York, e modelo talentoso y stima pa tur, Tanique Chan, na unda e lo forma parti di e pasarelanan na New York Fashion Week 2023 cu varios diseñadornan y modelonan internacional. Tanique no ta un hoben desconoci na Aruba. Tanique ta forma parti di e fabuloso skol di moda y talento The Chaz Modeling & Talent School. Pa varios aña Tanique ta formando parti di The Chaz Modeling & Talent School na unda e ta hajando les di modelahe, technica y experiencia. Y cu su talento Tanique a sa di resalta como un modelo excepcional. Na Aruba nos a disfruta varios baiha caba di e talento di Tanique den shownan di The Chaz Modeling & Talent School, awor ta toca turno pa mundo conoce Tanique. 

Tanique a representa Aruba aña pasa na Republica Dominicana den e evento Agnes Universe na unda e la logra e titulo di Reina del Tropico. Akinan e portanan a habri pa Tanique na unda tabata tin interes pa Tanique modela na fashion shownan internacional. Tanique lo ta riba pasarela diadomingo 12 di februari 2023 na New York Fashion Week caminda e lo modela diseñonan di e conocido diseñadora di Puerto Rico Wanda Beauchamp, cu trahenan exclusivo di Wanda Beauchamp Girls Couture. Colleccion di vestuarionan confecciona exclusivamente pa New York Fashion Show 2023. 

Otro luna Tanique lo ta modelando tambe na Los Angeles Fashion Week. Akinan e lo ta riba pasarela modelando collecionnan di un otro diseñador hopi conoci. Keda pendiente otro luna pa mas informacion.  

Pa otro siman nos lo tin un relato mas extenso con a bay cu nos super modelo Tanique Chan na New York Fashion Week 2023. Aruba mester ta hopi orguyoso di su hobennan talentoso cu ta sigi resalta den e mundo di moda y beyesa.