Parlamentario Marco Berlis (MEP): Si bo no ta opina manera Miguel Mansur, bo no tin derecho di opina c– Part 1

Mansur violando derecho constitucional di lidernan cristian usando calumnia y un actitud anti democratico 

Mi por a tuma nota di un articulo cu a sali den prensa diadomingo 12 di februari, den cual Mansur ta formula acusacionan sin base, y ta condena lidernan religioso di kier destrui democracia y hopi cos mas. Awe mi ta bay trece un analisis di su ponencianan falso, cual el a comparti riba Facebook y den un articulo den prensa. Mi por a ripara cu el a traha e articulo aki den panico y desesperacion, mirando cu e contenido ta demostra ignorancia di nos constitucion, falta di conocemento con esaki ta hinca den otro y su interpretacion corecto. Riba dje e ta demostra den e articulo cu e ta un persona cu ta descrimina cabalmente, y ta mi intencion pa expone na pueblo e arogancia di Mansur ora cu bo no ta opina manera e.

1. Mansur: lidernan di secta Cristian den conferencia di prensa a MENASA miembronan di Parlamento… Scuchando e pastornan, na ningun momento a menasa miembronan di Parlamento. Simplemente e vocifera cu nan a observa e tres partidonan cu a dicidi di sostene y inicia e ley aki. Cu pastornan lo urgi tur Cristian pa NO vota pa nan. Esey no ta un menasa Mansur, esey ta un derecho. E pastor tambe a subraya cu pueblo a pone Parlamentarionan riba e stoel y asina por kita nan di eynan tambe door di NO vota mas pa nan. Esey a haci dolor? Esey ta derecho di pueblo, dunador di trabao di parlamentarionan. Pueblo ta pone, pueblo ta kita! Bin bij, Esey ta democracia sr.Mansur!

• E derecho di expresa bo opinion libremente ta ancra den nos constitucion y tambe esun di practica bo religion. Expresa esaki y kier un Aruba sigui biba den cierto norma y balornan ta e derecho di cada ciudadano. Esey ta un derecho basico cu aparentemente no ta duidelijk ni tolerabel pa sr.Mansur ora no ta cumbini’e. E ta bisa di esaki; cu e opinion di lidernan religioso kier subordina nos democracia y hiba nos pais bek den tempo “primitivo” y esaki no por wordo permiti. Ken kier subordina democracia? Lidernan cu a comporta di un forma respetuoso, cu abo kier lastra cu mentira bisando nan kier kibra nos democracia? Fuera di mentiroso bo kier ta dictatorial tambe sr. Mansur. Pero bo intolerancia na esnan cu ta opina diferente cu bo, no ta desconoci. Ora eleccion a caba, bo a “fire” tres candidato, hasta bo number dos, pasobra nan ta pensa diferente cu bo. Bo style dictatorial y manipulativo por yuda bo den bo partido pero no den e democracia di Aruba!

• Mansur den su articulo ta descrimina y ta condena stranheronan Cristian. Segun Mansur mester considera lidernan Cristian stranhero como non-grata, cu nan permiso mester wordo revoca y deporta pa nan pais! Ki arogancia, orguyo y actitud mas dictatorial Mansur ta expresa aki! Prome discriminando stranheronan y expulsando nan pasobra segun e, nan ta destrui democracia cu nan opinion cu ta contrario na esun di dje! Imagina bo un persona manera Mansur den gobierno! Pueblo habri bo wowo y wak Mansur pa loke e ta. Un homber cu un agenda, cu no a biba na e pais aki, cu no ta import’e e balor, tradicion y cultura di nos pais. Un homber cu kier bulldoze cu su ley sin respeta expresion liber di pueblo. Un derecho fundamental di nos democracia! Si bo no gusta, deportacion ta wardabo! Esaki ta bo reresentante pueblo? Esaki ta ken ta traha pa Aruba?

Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!