Minister Rocco Tjon: A FIRMA E “LETTER OF INTENT” PA UN LOCALIDAD NOBO PA CUERPO POLICIAL ORANJESTAD
ORANJESTAD – Diaranson mainta, durante conferencia di prensa di Gobierno di Aruba, Minister di Husticia y Asuntonan Social Sr. Rocco Tjon, conhuntamente cu Korpschef, SPA y AA ICG PB Real Estate VBA a firma e “Letter of Intent” (LOI) pa asina adkiri un localidad nobo pa Cuerpo Policial situa na Oranjestad. A tene cuenta cu diferente aspecto prome cu adkiri e localidad nobo, pa asina percura cu esaki por cumpli cu e deseonan di Cuerpo Policial y Sindicato. Na mes momento a tene cuenta cu diferente aspecto di Siguridad, pero mester enfatisa tambe cu a logra concretisa esaki lihe, danki na e hecho di bon comunicacion entre partidonan envolvi.
Ta asina cu e proceso aki a inicia dia 1 di Februari, caminda a tene e prome reunion cu Alto Mando tocante e topico aki, consecuentemente for di Ministerio a reuni cu Sindicato di Polis di Aruba (SPA) riba 3 di februari. Pa dia 9 di februari a obtene e programa di rekisitonan cu e localidad nobo lo mester cumpli cune y e mesun dia a haya e prome oferta di e compania en cuestion. A base di esaki, a inicia e prome negociacionnan for di Ministerio y asina dia 14 di februari, e proyecto a wordo aproba den conseho di Minister. Asina por bisa cu dos siman despues cu a inicia cu e proceso aki, ya a firma e LOI pa asina e trabounan por inicia pa asina Cuerpo Policial por tin nan localidad nobo na comienso di April.
Pa loke ta e localidad nobo, a tene cuenta cu diferente aspecto y deseonan di Cuerpo Policial conhuntamente cu Sindicato di Polis, asina por bisa cu warda di playa lo muda for di Wilhelminastraat pa Paardenbaaistraat 12, cual ta e localidad caminda anteriormente tawata e consulado di Venezuela. Pa loke ta e edificio nobo, a percura pa esaki ta completamente ekipa cu mueblenan nobo, y ta bay renobe aun mas pa tene cuenta cu aspectonan di siguridad. Asina por bisa cu lo bay tin un sistema di intercom cu camara pa asina garantisa siguridad, pero tambe lo tene cuenta cu e parti di “verlichting”.
E proyecto aki lo conoce un expansion na e edificio actual, mirando cu lo mester bin “ophoudkamers” den e edificio pa por cumpli cu e rekisitonan di un warda di polis, na mes momento lo tin control di acceso, un sistema automatisa y moderno pa asina por eleva siguridad. Algo hopi importante tambe ta e parti di mantencion, particularmente pa e parti di schimmel, cual tawata un topico hopi sensitivo, pa cual motibo a percura pa den e LOI e compania en cuestion percura pa tin mantencion structuralmente pa e parti di “luchtbehandeling” y airconditioning.
Por ultimo, e mandatario a expresa cu e ta sumamente satisfecho y agradecido na tur e cuater partnernan cu a haci esaki posibel; Korpschef, SPA, AA ICG PB Real Estate VBA y tur e trahadonan di Ministerio di Husticia y Asuntonan Social.
