Informacion relaciona cu desfile riba dia 18 di maart Dia di Himno y Bandera 2023
GRUPONAN UNIFORMA CU META COMUNITARIO TA WORDO INVITA PA PARTICIPA DEN DESFILE NACIONAL
Pa medio di e comunicado aki Comision Celebracion Dianan Nacional (CCDN) ta informa cu e aña aki un biaha mas lo organisa e desfile di gruponan uniforma riba Dia di Himno y Bandera dilanti Plaza Libertador Gilberto F. Betico Croes despues di e acto protocolar dia 18 di maart proximo.
E desfile aki ta pa duna reconocimento na nos gruponan uniforma cu ta traha na bienestar y desaroyo di hobennan den nos comunidad manera schouting, gruponan gubernamental uniforma, gruponan di deporte uniforma y gruponan di baile den trahe folklore.
Desde awe por registra pa participa via nos E-mail adress ccdn@cultura.aw y tene na cuenta cu e ultimo dia pa inscrbi ta dialuna 27 di februari 2023 pa asina e comision por planifica e logista di e desfile corectamente.
Mester informa cu no ta permiti bestia y tampoco vehiculo di motor den e desfile. Pa dia 17 di maart dia di e Manifestacion Cultural riba plaza ta invita clubnan di auto clasico/ motorcycle por participa cu nan vehiculo den un car/bike show publico dilanti e parkeo dilanti Plaza G.F. Betico Croes.
