Booshi Wever: DI RED TAPE PA RED CARPET!

Poco siman pasa e gobierno MEP/RAIZ tabata di hubilo paso zogenaamd a kita COHO. Pero mientras tanto “achter de gordijnen” cos ta mustra diferente. Scondi manera ladron den anochi ta permiti total dominio Hulandes. Manera e dicho ta bisa “voor wat hoort wat”! Durante di carnaval nos a tuma nota presencia di marechaussee Hulandes aki na Aruba. Nos a bira un entidad Hulandes mescos cu e islanan BES? Nos polis riba caya y na aeropuerto no tin a capacidad pa haci e trabou aki? #dieptriest!

Ora nos kere cu esaki ta keda na e Hulandesnan so, nos ta mira un otro situacion straño na unda cu den cierto forma ta cambia of agilisa procesonan pa asina previligia stranheronan cu kier inverti na Aruba. Di e forma aki poco poco Aruba ta wordo bendi na poderosonan, sin tin e control necesario, y pone Aruba atrobe riba lista preto.

Como mandatario bo prome y unico preocupacion mester ta e bienestar di bo pueblo. Y si esey ta nifica cu bo mester bin cu reglanan pa garantisa esey, “so be it”! Esun cu kier yama esey “RED TAPE”, ta su asunto. Hamas ningun interes por ta mas cu esun di nos pueblo.

Asina nos por tuma nota di hopi cambionan, cu manera ladron den anochi, ta tumando lugar. Tur bou di e capa cu mester elimina e “RED TAPE”! Pero ta ken su interes ta wordo sirbi aki?

Dia cu como mandatario mi a implementa e reglanan estricto riba e maneho di admision, mi a haci esaki cu e unico meta pa sirbi interes di e Arubiano y di Aruba. Loke nos ta bin ta nota di dje ta un flexibilisacion di e maneho desde fin di 2009. E reglanan estricto aki tambe, pa esnan cu no ta “give a damn” cu e pueblo, ta yame “red tape”!

Añanan atras Aruba a bin cu reglanan estricto pa evita labamento di placa. E tempo ey Aruba tabata tin e apodo di “narco-complaciente”! MOT mester a bin. Esaki a wordo yama “RED TAPE”! Recientemente nos a tuma nota cu supuestamente lo bay kita e “red tape” cu tin riba e tereno aki. Ta ken su interes lo ser sirbi aki? Esaki ta pa facilita e labamento di placa di e sanger di e pueblo venezolano? Ya caba nos ta tuma nota cu e capital di hopi venezolano “chavez-complaciente” ta wordo laba facil.

Parce cu ta busca e “weg van de minste weerstand”, esta di baha e condicionnan pa e permisonan necesario pasobra lo ta trata aki di un “RED TAPE” pisa. Pero dicon no ta instrui e ambtenaarnan cu ta traha cu permisiologia, pa traha diligente, sin tin nodi di baha e rekisitonan cu ta wordo pidi pa por haya un permiso? Si pa garantisa un bon screening y background check di posibel inversionistanan y pa evita placa dudoso, pakico baha e rekisitonan di loke mester wordo entrega? Si un persona no por haya su papel di buena conducta, no ta e proceso ambtelijke ta tarda e cuenta, sino ta e doño di curpa mes ta percura pa e proceso tarda.

Ta parce cu e maneho di gobierno actual ta pa deshaci di e “RED TAPE ” cu lo mester sirbi e interes di e Arubiano, pa haci lugar pa e “RED CARPET” pa privilegia stranhero y placa procedente di e sanger di e pueblo venezolano!

Straño di henter e asunto aki ta cu un biaha mas, e partidonan tanto den gobierno y den oposicion ta den un “winterslaap” y ta laga e asuntonan aki pasa. Pueblo di Aruba lanta riba prome cu no tin nada mas pa hasi. E RED CARPET no ta sirbi e Arubiano, pero interesnan aheno. DI RED TAPE PA RED CARPET!