Secretario General di MEP: AVP a perde den Hoger Beroep riba un decision for di sla cu nan a tuma contra Eddie Briesen.

GRAN CULPABEL MIKE EMAN Y AVP

Secretario General di MEP, a tuma nota di e atakenan for di sla contra ex Minister Edison “Eddie” Briesen riba e topico di Aruba Music Festival y un placa cu Land Aruba mester paga na un grupo Lee Tofanello Associates ( LTA). Tur esaki despues cu Land Aruba esta gobierno di AVP dia 28 di januari 2010 a dicidi na un manera desproporcional pa kibra e contracto legitimo cu tabatin firma cu dicho grupo.

Histioria di Aruba Music Festival y LTA:

Na final di aña 2001, MEP a saca 12 asiento y a drenta gobernacion despues cu Henny Eman, ruman mayor di Mike Eman a laga Aruba na werki. Ingeniero Eddie Briesen den su calidad como Minister di Turismo cu un experencia enorme hunto cu ATA a contracta un compania di New Jersey (LTA) Lee Tofanelli Associates pa organisa conciertonan cu artistanan renombra e den lunanan cu Aruba su turismo ta abou.  Esaki lo contribui pa atrae hopi turismo pa nos isla. Asina a firma e prome contracto dia 14 di juni 2002 pa 4 aña cu dicho compania Lee Tofanelli Associates(LTA). E contracto aki tabata valido pa añanan 2002, 2003, 2004 y 2005. Na aña 2004, pues un aña prome cu e contracto vence a negosha un extension pa e siguiente 4 añanan. Dia 18 di juni 2004, a firma un contracto nobo pa 4 aña esta valido di aña 2006, 2007, 2008 y 2009. Mirando e exitonan cu e grupo aki a cosecha a bolbe drenta negociacion cu nan desde februari 2008.  Dia 1 di october 2008, a logra cera e sigiuente contracto pa e periodo 2010, 2011, 2012 y 2013. Den e ultimo pakete aki lo a trece e.o. e famoso artista y guitarista SANTANA. September 2009, AVP a gana eleccion y a logra drenta gobernacion 31 di october 2009. AVP a drenta cu sed di vengansa y a cuminsa kibra contractonan pa loco sin importa e daño cu nan lo causa na caha di pais Aruba.  Dia 28 di Januari 2010, apenas 3 luna den gobernacion Gobierno di  Mike Eman y AVP a manda un carta pa LTA avisando nan cu Land Aruba ta kibra e contracto cu dicho grupo.

Lee Tofanelli Associates ta lanta caso contra Land Aruba:

Momento cu LTA a ricibi e carta nan no a para keto. Den nan concepto nan tin un contracto valido cu ta papia cla y si Gobierno kibra e contracto nan lo mester cobra sea e contracto of e daño cu esaki a causa. Primordialmente, den e mundo aki bo ta “book” e artistanan renombra  entre 2 of 3 aña di aniticipasion pagando un “down payment” pa por garantisa nan “performance”. Nos ta corda informacionnan cu a circula desde 2009  cu pa aña 2010 of 2011 e famoso guitarista “Santana” tabata riba line up pa presenta den Aruba Music Festival. E grupo LTA a bay hues y den Corte di Prome Instancia LTA a perde unda lo a acusa Eddie Briesen di a actua contra Ley di Comptabilidad artikel 25 y 31. E grupo LTA no a keda satisfecho paso nan tin un contracto legitimo den nan man. Nan a bay Hoger Beroep y 22 di november 2016 (3) hues den Hoger Beroep a kibra e sentencia di Corte di Promer Instancia. Aki (3) hues a reconoce cu e contractonan firma ta un “voortzetting” di un bon samenwerking cu a inicia desde 14 di juni 2002. Alabes (3) huesnan a bari for di mesa cu Eddie Briesen lo a actua contra artikel 25 y 31 di Ley di Comptabilidad. Den e veredicto di HOF e (3) huesnan a splica na na rechtsoverweging (3.15) :” Het Land kan zich NIET ter goedertrouw op het bepaalde in artikel 31 van de comptabiliteitverordening beroepen en is dan ook aan de overeenkomst gebonden”. Gobierno di AVP kier a cologa Eddie Briesen riba artikel 25 y 31 di Ley di Comptabilidad pero (3) huesnan den Hoger Beroep a bari esaki limpi, limpi for di mesa. Culpabel mayor ta keda Mike Eman y AVP cu a kibra e contracto aki contra tur regla.