MINISTER ENDY CROES A REUNI CU PARLAMENTARIO RICKY HOEK.

ORANJESTAD: Diaranson mainta, riba peticion di Parlamentario di MEP, Sr. Ricky Hoek, Minister Endy Croes a reuni cu Sr. Hoek, unda a trata diferente topico. Durante e encuentro Sr. Hoek a presenta diferente proyecto cu e ta desea di realisa riba e.o. tereno di enseñansa, social, labor y husticia. Sr. Hoek ta interesa pa sondea e posibilidadnan pa educa hobennan te cu edad di 25 aña cu ta cera na KIA. Unda cu e hobennan por ricibi un educacion den KIA, pa ora cu nan sali nan por sigui cu un estudio y/of trabou. E proyecto aki ta conta cu e apoyo di Ministerio di Enseñansa y Ministerio di Husticia y Asuntonan Social.

Banda di esaki Sr. Hoek a mustra hopi interes den e Ley di Leerplicht, cu tin mester di atencion y adaptacion. Sr. Hoek ta desea di bin cu cambionan pa mehora e Ley di Leerplicht. Den cuadro di esaki a haci Minister Endy Croes a yama un reunion cu Inspectie Onderwijs, Bureau Leerplicht y Parlamentarionan di Fraccion di MEP pa dia 15 di maart proximo. Unda ta bay trata e “pijn punten” den e ley. Minister Endy Croes a indica cu e.o. den ley ta para cu e Minister di Enseñansa tin cu duna boet na e mayornan cu nan yiu no ta bay scol. Sinembargo, na ningun pais na mundo e Minister encarga cu enseñansa no ta duna un boet, e departamentonan concerni ta keda encarga cu esaki. Tin diferente punto cu lo wordo trata den e siguiente reunion, unda cu Sr. Hoek lo encabesa e trayecto aki y asina cana e proceso pa e ley por yega Parlamento di Aruba y asina haci cambionan den e Ley di Leerplicht. Concluyendo, Minister Endy Croes a expresa cu nos lo traha hunto pa realisacion di e proyecto y adaptacionnan legal en cuestion